Koçberê elewîyê ke qirkerdişanê vera elewîyan ê Sûrîye ra remayî û verê xo da Îdareyê Xoserî yê Rojawanî ANFyî rê qala wehşetî ke anto kerd.

Y.R. yo ke pîya bi cinî û domananê xo herêmanê binê kontrolê HTŞyî rema û vera xo waranê Îdareyê Xoserî ard ziwan ke çîyo ke hukmatê demdemî yê HTŞyî vera înan kerd qirkerdiş o û nê vatî: ''Bado ke hukmato demdemî ame ronayene ma têna dizdîye, cînayet û remnayîş dî. Cinî û domanî zî remnayêne. Ma zî mecbûr mendê ke Humusî ra vejîyê. Têna herêmanê Îdereyê Xoserî de asayîş û wayûbiratîye est o. Tîya pêro şarî ma qebul kenê.

HTŞyî qaçîko wezîrîye û dezgehê edaletî nayî ro la nê pêro têna qale de est ê. Grûbê sey Şişan, Igor û grûbê sey înan ke goreyê mi nê terorîst ê, hêrişê dewan kerd. Berê ma şikitênê kewtêne zere. Keyeyê ma kerdêne xirabe û çîyo ke wazenê diznayêne. Ciwanan rê îşkence kerdêne. 10-15 hezar kesî ameyî remnayene. Înan ra tayî qet nêameyî vînayene. Cinîyî bi hewayêkê sîstematî ameyêne remnayene û rotene. Domanî zî ameyêne qetilkerdene. Ê ke peyî de mendî ya mergî rê ameyêne têrî ya zî semedê remayîşî her çî girewtêne çimî.''

N. E. zî ard ziwan ke ê raştê hêrişanê giranan ameyî û vat Rixmo ke înan zaf dizdîye û qirkerdişî kerdî îdîakerdêne ke înan nêkerdo la serê înan de kincê hêzanê asayîşî yê Sûrîye bibî.