Baroyê Çapemenîye yê DEM Partî vat: ‘’Tayê dezgehanê medya de xeberî vanê ke vera Endamê Heyetê Îmraliyî û Serekwekîlê Meclîsî Sirri Sureyya Onderî suîkast ameyo kerdene. Nê xeberan ser o ma na eşkerayîye danê.

2yê nîsane de wezîfedarê otoparke wexto ke wesayîtê Onderî ramitêne lastîkan ra veng ameyo û ey wesayît şawito servîsî. Netîceya cigêrayîşî de ame tesbîtkerdene ke lastîkanê peyênan de dafikêka tûje ya asinêne est a ke eşkena lastîkan biteqîna.

Onderî serebût partî de pare kerd û ma cigêrayîşê hewceyî kerdî. Serebût û delîlî meqamanê fermîyan rê ameyî parekerdene. Hem partîya ma hem zî Onderî babete nêzdî ra teqîb kerdêne. Derheqê cigêrayîş û tehqîqatî de netîceyêka zelale nêkewte destê ma.’’