Sînorê Wan-Îranî de bi hezaran multecîyî ni asanî derbaz benê. Labelê kurdê Rojhelat û Vakurê Kurdîstanî wexto ke sînorî ra derbaz benê hetê leşkeranê Îranî û Tirkîya ra yenê înfazkerdene û leşkeran rê ceza nêdîyena.

Mîyanê 20 serranê peyênan de tewr tay 300 kesî serê sînorî de ameyî qetilkerdene. Tewr peyên Behnam Samadî (17), babîyê 5 domanan Hesen Keçelano (44)ê ke kolber ê, 14ê nîsan de dewa Beydoganî ya qezaya Çaldiranî de tepişîyayî û ameyî berdene bi qereqolê leşkeran.

Wird kolberan rê îşkence û heqaretî ameyî kerdene. Leşkeran dima kolberî eştî serê sînorî. Hesen Keçelonayî dinyaya xo bedilnaye, Benham Samadî sey birîndarî xelisîya.

Behman Samadî çend saetan ra dima resa nêzdîyê dewe û dewijan ra hetkarîye waşte. Samadî û dewijî şîyî cayo ke Keçelano tede merd. Uca de dewijan û leşkeranê Îranî rê qala serebûtan kerde. Labelê leşkeranê Îranî vat ke ê do cenaza nêberê. Dima ke leşkeranê Îranî cenaza teslîmê leşkeran ê tirkan kerde cenaza wedarîyaye morgê Zanîngehê Yuzuncu Yilî yê Wanî. Dozgerîya Komare ya Çaldiranî zî pê sûcdarîya 'qestî ra kiştişê merdiman' dest pê tehqîqatî kerd. Çarçewa tehqîqatî de îfadeyê 3 leşkerana ame girewtene.

Endamê Komîsyonê Heqanê Merdiman ê Baroyê Wanî Rojhat Levent Ozgokçeyî herême de cigêrayîşî kerdî, dewijan dir qisey kerd. Ozgokçeyî pare kerd ke ê do derheqê serebûtî de raporê xo wextêkê nêzdî de rayaumûmîye reyde pare bikerê.