Dîwanê Hemserekîya Kongra-Gelî derheqê 8’ê Adare de peyamêka nuştekîye weşanaye û nê pare kerdî:

 “Vera zext, zulm û kedwerdîya ke sîstemê nêrî awan kerda, ma 8’ê Adare Roja Cinîyan a Mîyanneteweyîye ya hema cinîyan pîroz kenê. Ma roja 8’ê Adare ya hemrayanê cinîyan ê ke binê banê KJK û PAJK’î de xo rêxistin kenê û  mîyanê refanê YJA-Star, YPJ, YJŞ’î de şer kenê, pîroz kenê.Bi saya Rayber Apoyî cinîyê Kurdan Kurdistan û Rojakewtena Mîyanêne de ameye sewîyeya rayberîye û bi vîr û nasnameyo xoser cinîyan xo newe ra aferna. Seba naye zî  Têkoşînê Azadîye yê Kurdistanî eynî wext de Têkoşînê Azadîye yê Cinîyan o. Têkoşînê Azadîye yê Cinîyan ewro her cayê dinya de destanan nuseno. Bi nê wesîleyî ma heskerdiş û rêzanê xo Rayber Apoyî rê pêşkêş kenê û roja 8’ê Adare zerrî ra pîroz kenê. Serkewtişê têkoşînê Vakûr û Rojhelatê Sûrîye yê vera DAÎŞ’î, serkewtişê têkoşînê cinîyan ê azadan o. Bi coşê nê serkewtişî ma 8’ê Adare pîroz kenê û şehîdanê cinîyan ê şerê vera DAÎŞ’î bi rêz û hurmet yad kenê.

Nê 8’ê Adare de xoverdayîşêko bîn esto ke bi rayberîya cinîyan ameyo destpêkerdene. Seba wedaritişê tecrîdê serê Rayber Apoyî, rayberîya Leyla Guvene de grevê vêşanîye ameyî destpêkerdene û prosesêko ke do bieşkewo tarîxê bido vurnayene, nika yeno ciwîyeno. Xoverdayîşê grevê vêşanîye bi xoverdayîşê Leyla Guvene Amed de ame destpêkerdene. Bado zîndananê Vakûrê Kurdistanî  û Tirkîya ra vila bîyî. Nika zî zaf bajaranê dinya ra, sey Strasboûrg, Gal, Toronto, Dûîsbûrg, Nurnberg, Kassel, Den Haag, Mexmûr, Vîyana, Cenevre û Kelar de dewam keno. Eynî wext de 1’ê Adare de zîndanan de bi beşdarîya hezaran girewteyanê PKK û PAJK’î kewt sewîyêka newîye. Na sewîyeya nikayî seba ameyoxê şaranê Kurdistan, Tirkîya û Rojakewtena Mîyanêne sewîyêka stratejîk a. No proses de do krîzê ekonomîk û sîyasî  kûrtir bibê û xoverdayîşo cimatkî yo ke dormeyê grevê vêşanîye de xurt bîyo, bi têkoşînê 8’ê Adare girdêr bibo. No xoverdayîş do bi Newroze bireso tîtikê û weçînitişê herêman ê 31’ê Adare derbe bidero faşîzmî ro.

Çîyo ke aseno  o yo ke fazşîzm do yan birijîyo yan zî birijîyo. Hemrayê ma û çalakwanê grevê vêşanîye eşkera kerdo, heta ke tecrîd biwedarîyo do têkoşînê xo dewam bikerê.  Roje roja xoverdayîşî ya. Ganî şarê ma dormeyê xoverdayoxanê grevê vêşanîye de bibê xeleke û nê xoverdayîşî gird bikerê.Çalakîyanê 8’ê Adare de heme çalakîyan de ganî waştişê Leyla Guvene û waştişê xoverdayoxanê grevê vêşanîye yo ke wazenê ganî tecrîdê Îmraliyî bêro wedaritene, ganî bibo rojdemo serek. Bi nê wesîleyî ma reyna 8’ê Adare Roja Cinîyan a Mîyanneteweyîye pîroz kenê û heme cinîyan ê ke seba cuyêka têduşte û azade xover ro dayo zerrî ra silam kenê.”