Serkêşîya Platformê Ziwanê Kurdkî û Torra Ziwan û Kulturê Kurdan de bi wesîleya Roşanê Ziwanê Kurdkî xeylêk çalakîyî ameyî kerdene. Çalakîyan de vera asîmîlasyon û qirkerdişî veng dîya ke wa wayîrê ziwanê kurdkî bêro vetene.

Çewlîg

Çewlîg de bi wesîleya Roşanê Ziwanê Kurdkî rêxistina HDPyî eşkerayîyeyêke daye û bale ante muhîmîya ziwanê dayîke ser. Eşkerayîye de qedexekerdişê ziwanê kurdkî sey zulmî ame hesibnayene û ame vatene heqê her kesî esto ke ziwanê xo yê dayîke de qisey biero. Eşkerayîye de ame vengdayene ke wa ziwanê kurdkî bibo ziwanê perwerdeyî û şarê kurdî ra zî ame waştene ke wa wayîrê ziwanê xo vejîyo û her warê cuye de ziwanê xo  qisey bikero.

Şirnex

Şirnex de bi wesîleya 15ê Gulane Komeleya Kultur û Hunerî ya Birca Beleke Cizîre de eşkerayîyêke daye. Aktîvîstê TJA, Wekîlê HDPyî Hasan Ozguneş, Rêxistina HDPyî, Mayê Haştîye û Hemşaredarê Cizîre zî tewrê eşkerayîye bîyî. Hemsereka HDPyî ya Cizîre Zîlane Ecevît eşkerayîye wende û vat: ''Dewletê serdestî seba çinkerdişê ziwan, erj û kulturê kurdan pêro polîtîkayan visnenê dewre. Ma do nê astengîyan wedarnê.''

Êlih

Êlih de Parka Yilmaz Guneyî de eşkerayîyêke ameye dayene. Wekîlê HDPyî Ayşe Acar Başaran û Necdet Îpekyuz zî tewrê eşkerayîye bîyî. Hemvervatoxê Temsîlkarîya Platformê Ziwanê Kurdkî ya Êlihî Elîfe Kivircik eşkerayîye de pare kerd ke ganî kurdkî her ca de bi ziwanê xo qisey bikerê.

Semsûr

Komeleya Cigêrayîşanê Kultur û Ziwanî yê Feratî Parka Demokrasî de eşkerayîye daye. Hemşaredarê Bajarekê Komirî Erhan Karakal û xeykê temsîlkarê rêxistinan tewrê eşkerayîye bîyî. Eşkerayîye de bale ameye antene tedaya vera kurdkî ser û ame waştene ke wa kurdkî biba ziwano fermî. Dima dengbêjan deyîrî vatî.

Meletî û Dîlok

Meletî û Dîlok de zî rêxistinanê HDPyî seba 15ê Gulane bernameyêke viraşt û eşkerayîye daye.

Colemêrg

Rêxistina HDPyî ya Colemêrgî seba 15ê Gulane eşkerayîyêke daye. Cinîyî pê kincanê xo yê neteweyîyan tewrê eşkerayîye bîyî. Eşkerayîye de wina ame vatene: ''Ma sîstemê asîmîlasyon û qedexeyî yê vera kurdkî qebul kenê. Ma do nê erdî de nê sîstemî çin bikerê û newe ra awan bikerê.''

Mêrdîn

Qezayanê Artukluyî, Qoser û Nisêbînî yê Mêrdînî de bi bernameyan Roşanê Ziwanê Kurdkî ame fîrazkerdene. Bernameyan de pankartê bi kirdkî û kirdaskî yê sey 'Kamîya kesî binê zimanê kesî de nimite yo" ameyî akerdene. Hemsereka HDPyî ya Mêrdînî Perîhane agaoglu bername de waşt ke wa pêro kurdîstanijî bi ziwanê xo qisey bikerê.

Îstanbul

Komeleya Cigêrayîşanê Kurdan û Merkezê Kulturî yê Mezopotamya (MKM) qezaya Esenyurtî de bi rayraşîyayîşêlî Roşanê Ziwanê Kurdkî fîraz kerd. Wekîla HDPyî Zuleyha Gulum û bi se kesan tewrê rayraşîyayîşî bîyî. Cinîyî pê kincanê herêmîyan tewrê rayraşîyayîşî bîyî. Hemsereka Komeleya Cigêrayîşanê Kurdan Remzîye Alparslan ard ziwan ke kurdî bi serran o kenê ke ziwanê xo bipawê û ganî hînî kurdkî biba ziwano fermî û ziwanê perwerdeyî. Hemserekê Komeleya Cigêrayîşanê Kurdan Eyup Subaşiyî zî îfade kerd ke  heta ke kurdkî biba wayîrê statuyî ê do têkoşînê xo rê dewam bikerê.  Hemserekê HDPyî yê Îstanbulî Ferhat Encuyî rayraşîyayîş de venga pêro kurdan da ke vera asîmîlasyonî wayîrê ziwanê xo vejîyê. 

Mersîn

Rêxistina HDPyî ya Mersînî Parka Ozgur Çocukî de eşkerayîyêke daye. Eşkerayîye de pankartê bi kirdkî û kirdaskî yê sey 'Ziwanê Ma Rûmetê Ma Yo' ameyî akerdene. Eşkerayîye ra dima girse bi çepik û sloganan ver bi bînaya HDPyî şi û tîya de derheqê tarîxê kurdkî de sînevîzyonêk ame mojnayene, şîîrî ameyî vatene û dengbêjan kilamî vatî. Bername bi deyîranê Kadîr Çat û govendan qedîya.

Îzmîr

Komeleya Cigêrayîşanê Kultur û Ziwanî ya Avesta Warê Seyranî yê Sarniçî de şayîyêke viraşte. Şayîye de Îdarekarê Komeleya Avesta Mustafa Borakî qisey kerd û waşt ke wa neslo newe bi kurdkî qisey bikero. Qiseykerdişan ra dima wendekaranê ke kirdkî û kurmanckî perwerdeyê xo qedînayo, sertîfîkayî girewtî. Şayîye bi sloganê 'Bê ziwan cuye nêbena' qedîyaye.

DBP û HDP

Merkezanê Pêroyîyan ê DBP û HDPyî bi eşkerayîyanê nuştekîyan 15ê Gulane fîraz kerd û waşt ke astengîyê vera kurdkî bêrê wedaritene.