Fermandaranê Qerargehê Merkezê Pawitişê Şarî ra Amed Malazgîrtî derheqê xoverdayîşê gerîlayan û hêrişanê îşxalkeran de ANFyî rê qisey kerd.

Malazgîrtî verî bi wesîleya serrgêra Xoverdayîşê Rojeyê Mergî yê Pîlî M. Hayrî Durmuş, Kemal Pîr, Alî Çîçek û Akîf Yilmaz yad kerd û vat: ''Nînan qetî verê dişmenî de milê xo nêard war, mîyanê PKKyî de ruhê fedayîtî awan kerd û no ruh bi xetêke.''

Malazgîrtî dima bale ante hêrişanê îşxalî yê dewleta tirke ser û vat: ''Dewleta îşxalkere 14ê nîsane de hewayî ra û 17ê nîsane de zî erdî ra dest pê hêrişan kerd. 3 mengî yo şer dewam keno. Zap, Metîna û Avaşîn de gerîlayî bi ruhê Hayrî Durmuş û Kemal Pîrî şer kenê. Ez şexsê înan de pêro şehîdanê ma yad kena.

Nê 3 mengan de gerîlayan vera hêrişanê dewlete yê bi destekê NATOyî xoverdayîşêko pîl mojna û derbê giranî dayî dişmenî ro. Zap, Metîna û Avaşîn de hema zî şerêko giran est o. Dewleta tirke vera gerîlayan hêzanê taybetan, hêzanê xo, teknîkê NATOyî reyde cerganê DAÎŞî, qoricîyan, cerganê El Nûsra nê şerî de xebitnena. Dewleta tirke vera gerîlayan çeka kîmyewîye, bombaya fosforî û çekanê nukleeran zî xebitnena.

Kombîyayîşê peynî yê NATOyî de eşkera bi ke dewlete nê şerî de têna nîya û vera kurdan konseptêko mîyanneteweyî est o. Çeteyê çarkesan o ke tede Erdogan, Bahçelî, Soylu û Hulusî Akar ca gênê, cenazayanê gerîlayan rê çîyanê xiraban keno û keyepelanê xo de weşaneno. Dewlete cenazayanê ma pê kerrayan parçe kena, pakena û qeyd kena. Ganî rayaumûmîya demokratîke û rojnamegerî nê kerdişan teşhîr bikerê. Dewleta tirke hema wayîra cenazayanê xo nêvejîyena, cenazayan kendalan ra erzena war, dana bombayan ver.

Hêrişanê îşxalî verî rojhelatê Zapî de dest pêkerd. Dişmen dima teng bi û xo rê gera  rayîrêk;

*Dişmenî hêrişê xo ver bi Girê Hekarî û rojawanê Zapî hîra kerdî. Xeta Şehîd Şahînî de serkêşîya embaz Bager û Avzeme de dişmenî derbê giranî werdî, cenazayê dişmenî tunelan de mendî, embazanê ma dest na malzemeyanê înan ser. Dişmen waşt bikewo tunelan zî xîretê ci ameyî pûçkerdene. Dişmenî bi desan reyî çeka kîmyewîye şuxilnaye û key pê nêeşka teqayîşêko pîl kerd.

*Girê Cehenemî de dişmen raştê xoverdayîşê komêka gerîlayan ame. Gerîlayî şîyî dişmenî ser, da dişmenî ro û netîceyê pîlî vistî destî.

*Warê Çîyareşî de dişmenî derbê giranî werdî. Şikefta Birîndaran û Karker de embazê ma 3 mengî yo hêrişanê dişmenî pûç kenê û xo ver danê. Dişmen dima ke pê çeka kîmyewîye pê gerîlayan  nêeşka, Şikefta Birîndaran de pê kepçe û wesayîtanê zirxînan wazeno ser bikewo.

*Xoverdayîşê Werxelê 3 mengî yo binê şertanê giranan de dewam keno. Dişmen nê tunelan de gazê jehrînî şuxilneno, teqayîşanê pîlan keno, tunelan vêşneno la embazê ma xo ver danê. Wexto ke dişmen keweno zereyê tunelan embazê ma vera înan çalakîyan kenê û dest nanê malzemeyanê înan ser. Dişmen rixmê pêro xîretan zî nêeşkeno nê girî 90 rojî yo bivisno destî.

*Çemço de embazan derbê giranî dayî dişmenî ro, wesayîtê zirxînî yê dişmenî îmha kerdî. Nê warî de apeyşîyayîşê dişmenî dewam keno.

*Dişmenî pê teyarayan hêrişê Kokerî kerd û dima zî pê gaz û çeka kîmyewîye hêrişê ci kerd. Koker de şerêko cidî ame kerdene û dişmenî derbê giranî werdî. Dişmenî seba ke xo serkewte bimojno bombayê termobarikî şuxilnayî û waşt ke ser bikewo.

Dişmenî vatêne qey o wextêkê kilmî de do ser bikewo la raştê xoverdayîşêkê pîlî ame. Dişmenî seba ke xo sey serkewte bimojno hêrişê xo ver bi rojawanê Zapî hîra kerdî la reyan derbî werdî. Embazanê ma yê Girê Amedîyê tay cenazayê dişmenî vistî destî. Eke dişmen ameyo do hesab bido. Dişmen bêbedel do nêkewo cayêkî. Dişmen do hesabê her gama xo ya îşxalî bido. Wexto ke şer beno derg şîdetê ci zî do bizêdîyo. Gerîlayî her ca de yê û her ca de do xoverdayîşî geş bikerê.''