Çimdarê sîyasîyî yê Rojhelatê Kurdîstanî Ezîz Mamlêyî vera hêrişanê îşxalî yê dewleta tirke yê serê Başûrê Kurdîstanî nêrazîbîyayîşê xo mojna. 

Mamlêyî ard ziwan ke Erdogan û dewleta tirke wazenê kurdan bi temamî qir bikerê. Mamlêyî vat: ''Dewleta tirke Efrîn, Rojawan û Başûrî îşxal kena, multecîyanê Rojhelatê Kurdîstanî Îranî rê teslîm kena, Ewropa de hêrişanê kurdan kena. Dewleta tirke wazena Qendîl bivisna destî la eke Qendîl bikewo temamîya Başûrî kewena. Dewleta tirke 2 mengî yo Başûr de xeylêk dewî veng kerdî, darî birnayî.

Ganî kurdî çar parçeyanê Kurdîstanî de û teberê welatî de vera nê hêrişan wurzê payan ser. Neteweyê Yewbîyayeyî, Konseya Ewropa û Parlamentoya Ewropa vera hêrişan bêveng ê. Coka ganî roşnvîr, sîyasetmedar û hunermendê kurdî bibê yew û çalakîyan bikerê. Eke vera hêrişanê dewleta tirke nêrazîbîyayîş nêro mojnayene hêrişî do bizêdîyê. Başûr, Vakur, Rojawan yan zî Rojhelat ferq nêkeno. Kamyew parçe qels bibo zerar do bireso pêro parçeyan.

Gerîlayî vera hêrişan bi xurtî xo ver danê ez pê gerîlayan bawer a. Ganî pêro kurdî paştî bidê gerîlayan.''