Colemêrg de ke warê Ehmedê Xanî û Feqîyê Teyranî yo, tede 73 hezar û 224 wendekarî neçare manenê ke bi ziwanê tirkî perwerde bivînê. Şaristan de 3 hezar û 839 mamostayî estê ke na hûmare goreyê hûmara wendekaran zaf tay a.

Hemserekê Şubeyê Colemêrgî yê Sendîkaya Kedkaranê Zanistî û Perwerdeyî (Egitim-Sen) Murat Balikesîrî derheqê mesele de ANFyî rê qisey kerd.

Balikesîrî ard ziwan ke Colemêrg de cara karê perwerdeyî kêm ê û prosesê janî de na rewşe hîna bîye giranêr. Balikesîrî vist vîrî ke perwerdeyê bi ziwanê dayîke heqo xozayî yo û peymananê mîyanneteweyîyan de madeya verên a. Balikesîrî da zanayene ke perwerdeyê bi ziwanê dayîke xeylêk girîng o la dewlete na babate de polîtîkaya asîmîlasyonî rê dewam kena.

Balikesîrî vat: ''Vera nê kerdişanê dewlete ganî ma keyeyê xo de bi kurdkî qisey bikerê, semedê musayîşê nuştiş û wendişê tirkî xîret bikerê. Domanê ke bi ziwanê dayîke perwerde nêvînenê erey her çi musenê û nêeşkenê xo tam îfade bikerê. Colemêrg de wendekarê ma wexto ke çîyêkê bi tirkî wanenê fam nêkenê. Domanî çîyo ke wanenê verî bi ziwanê dayîke fam kenê dima açarnenê tirkî ser. Meseleya bingeyîne perwerdeyê bi tirkî yo. Heta ke perwerdeyê bi ziwanê dayîke nêbo mesele dewam kena.''