Roniştoxanê Kampa Multecîyan a Şehîd Rûstem Cûdîyî (Mexmûrî) derheqê koçê xo yê Başûrî û zulmê PDKyî de ANFyî rê qisey kerd.

Şukrî Nêrwehîyî dîyar kerd ke ê zulmê dewleta tirke ra neçare mendê ke dewa xo biteriknê û vat: ''Ma vatbi ke tîya zî erdê ma yo û ma ameyê. La hêverî kampa ma de  hîrê camêrdî dîyayê vîndîkerdene. Ma şîyî ke aqîbetê nînan bipersê. O çax Nêçirvan Barzanî ame pêvînayîşî la ey vat ke Başûr de eke çew vera Barzanîyan sereyê xo wedarno, sereyê ci do bêro eciqnayene. Çîyo ke dişmen nêkeno PDK kurdan rê keno. Îxanetê înan çar parçeyanê Kurdîstanî rê yo. Kurdanê Vakurî tim xo resna hewarê PDKyî la PDKyî wina nêkerd. Çend rojî verî înan verê di embazan de dafike nabî ro. Keyeyê Barzanîyan menfaetanê kurdan ney menfaetanê xo paweno. Îdrîs Barzanî kesêko neteweperwer bîyo û çew nêeşkeno xirabîya ey ser o qisey bikero. Heyf ke Nêçîrvan Barzanî lajê ey o.

2015 de wexto ke ez Mêrge Şîşê ra agêrayêne tepişîyaye. Ez bi bahaneya 'hetê PKKyî de ya' tepişîyaya. Mi zî vat ke fikrê mi fikrê PKKyî yo la ez kurd a û mi rê mabênê kurdan de ferqêk çin o. Ez 20 rojan zîndan de tepişîya. Mi zîndan de zî înan rê vat ke oyo ke înan ma rê kerdo xayînan rê nêkerdo. Axir bi xîretanê dostêkê babîyê xo ez vera dîya.''

Tekîn Qewalîyî ard ziwan ke o 2028 de wexto ke karî ra agêrayêne keyeyê xo hetê asayîşê Dihokî ra tepişîyayo. Qewalîyî vat: ''O çax Asayîşê Dihokî wina nêzdîyê mi bi ke çew dişmenê xo rê wina nêkeno. Mi rê ame vatene ke ez do teslîmê Tirkîya bêra kerdene û Xabûr de biroşîya. Mi rê îşkence ame kerdene, heqaretî ameyî kerdene. Mi çîyo xirab nêkerdbi. Ê kesî endamê PDKyî bîyî la seba îstîxbaratê tirkan xebitîyayêne. Înan mi rê zaf teda kerde ke ez sey înan biba. La mi qebul nêkerd. Xora mîyanê înan de huqûq û edalet zî çin ê. Seba ke ez vejîya verê mehkeme mi serrêke pawit.

Asayîşî mi rê gef wend ke eke ez ancî şora Behdînan ê do mi bikişê yan zî teslîmê Tirkîya bikerê. Hema zî herêma Behdînan mi rê qedexe yo. Ez Vakur de zî çend reyî tepişîyaya la mi çîyêko sey kerdişanê PDKyî nêdî. Ma hema zî pawenê ke PDK do îxanetî ra fek vera bido. Nika Dihok, Hewlêr û Zaxo bi temamî binê kontrolê dewleta tirke de yê. Wa PDK îxanetî ra abigêro û hinî kurdan rê çîyanê winayênan nêkero.''