Fermandarîya Qerargehê Merkezê Pawitişê Şarî (MPŞ) seba fermandar û şerwanan mesajêk weşana. Mesajê Fermandarîya Qerargehê MPŞyî wina yo:

''Dewleta tirke ya faşîste bi taybetî 7 serrî yo hêrişanê xo yê vera Rayber Apoyî, gerîlayan û Şorişê Rojawanî tim zêdînena la nêeşkena netîceyêke bivisna xo destî. Nika mabênê Rûsya û NATOyî de şerêk est o. Dewleta tirke zî wazena nê şerî ra menfaet bivîna. Rejîmê AKP-MHPyî wazeno ke bi bedelê destekê înan şerê xo yê vera ma de destek bigêro. Dewleta tirke nînan reyde parçeyanê Kurdîstanî de zî torra ajanan aver bena û xeta îxanetî ya PDKyî reyde têgêrena. Dewleta tirke eke hende hêrişanê kîmyewîyan kena hemkarîya PDKyî ra eşkena bikera. La wa PDK bizano ke qetî dewleta tirke do ey zî tasfîye bikera. 

 Dima ke DAÎŞ bin kewt dewleta tirke hînî tira omidê xo birna û 2015 de Planê Çokdayîşî vist dewre. La no plan zî netîceya xoverdayîşê şar, gerîlayan û Rayber Apoyî de ame pûçkerdene. Nika verê Tirkîya de weçînayîşêk est o û tewirê şarê kurdî qederê nêweçînayîşî do dîyar bikero. Ewro hêzê Rayber Apoyî û tewirê şarê kurdî seba sîyasetî babetê kilîdî yê. Nê weçînayîşî de kurdî terefê kamî bigêrê o teref do ser bikewo. Dewleta tirke û rejîmê AKP-MHPyî seba ke vera têgêrayîşê azadîye bin kewtê nika verî se vato binpay kenê û reya verêne ra agêrenê. Dewleta tirke kombîyayîşê Madridî yê NATOyî de, Tehran de, Kombîyayîşê Şangayî de û kombîyayîşê Neteweyanê Yewbîyayeyan (NY) de seba şerê vera têgêrayîşê azadîye destek waşt û netîce sey waştişê ci nêbîye. Erdogan nika hedef keno ke nêzdîyê weçînayîşî de bi destekê Rûsya hêrişê Rojawanî bikero û weçînayîşan de ser bikewo, seserra Peymana Lozanî de vera kurdan ser bikewo. 

Eke nê weçînayîşan de no rejîm şêro, sîstemê serekîye zî do birijîyo û sîyasetê qirkerdişî yê vera Kurdîstanî do derbe bigêro. Coka nê weçînayîşî zaf girîng ê. Îxtîmal est o ke dewleta tirke bi destekê Rûsya hêrişê Rojawanî bikera. Nika dewleta tirke nê çend aşman de do hêrişê Herêmanê Pawitişî yê Medya rê dewam bijera û dima zî verê xo bida Rojawanî.

Şerê Herêmanê Pawitişî yê Medya her hetî ra zaf girîng o. Netîceyê nê şerî zî bi taybetî seba şarê ma zaf krîtîk ê. Şerê Şarî yo Şorişgêr hîrê serrî yo rojdemê têgêrayîşê ma de yo. Seba ke Herêmanê Pawitişî yê Medya de şar dîyabi koçkerdene tîya de Şerê Şarî yo Şorişgêr di lingan ra yeno caardene; gerîla û şerê tunelan. La cayo ke tede şarê ma est o ke Şerê Şarî yo Şorişgêr ganî çar lingan ra bêro rêxistinkerdene; şerê şar, gerîlayan, xopawitiş û tunelan.  Eke wina bibo Şerê Şarî yo Şorişgêr qetî do ser bikewo. 

Dewleta tirke Herêmanê Pawitişî yê Medya bi çekanê nukleran şer kena la nêeşkena nê çekan Rojawan  de bişuxilna. Eke Rojawan de Şerê Şarî yo Şorişgêr bêro kerdene şar do ser bikewo. Coka ganî şarê Rojawanî erdê xo meterikno, şer bikero û hêzê leşkerî zî amadekarîya xo bikerê. 

Şerê Herêmanê Pawitişî yê Medya asta krîtîke de yo. Zimistan ho dîyeno. Dişmen hetêkî ra amadekarîya şîyayîşî keno hetêkê bînî ra zî bi lezî wazeno netîce bigêro. La gerîlayê ma bi felsefeya Rayber Apoyî xoverdayîşêkê destanwarîyî kenê. Ewro ganî ma hînî nê xoverdayîşê şehîdan biresnê serfîrazîye û netîce. Bêguman ma do xoverdayîşê Îmraliyî, zîndanan û şarê ma ser o xoverdayîşê xo berzêr bikerê. Bingeyê nê xoverdayîşê gerîlayan de felsefeya Rayber Apoyî, taktîk û stratejîyê dewrê neweyî est ê. 

7-8 serrî yo ma şerê tunelan kenê ke nê tunelî netîceya xebatêka zehmet û derge ya embazan de virazîyabî. Hetê bînî ra felsefe û îdeolojîya Rayber Apoyî zî qehremanîye, fedakarî, çêrî û yewîye afernayî. Esaso tewr bingeyî yê nê xoverdayîşî zî ruhê embazîye yo. Hetêkî ra zî serkêşî, îrade û hêzê cinîyan xoverdayîşê ma hîna aver benê û bihêz kenê. Ewro ma vînenê ke sloganê ma 'jin jiyan azadi' pêro dinya ra vila bîyo. Bi taybetî çalakîya Mersînî ya Sara Goyî û Rûkene Zelal hêz û îradeyê cinîyan eşkera kerd. Ganî pêro embazê ma goreyê na xeta azadîye ya cinîyan têbigêrê.

Girîng o ke ça de benê wa bibê embazî pê têkoşîn û xoverdayîşê xo, têkoşîn û xoverdayîşê xo embazanê xo yê bînan temam bikerê. Yanî wa çew xebeta xo bêerj nêvîno û xo zî bêfayde nêvîno. Embazê ma ganî verî xo, embazanê xo, erjanê xo û xeta xo bipawê. No erkê pêro milîtanan o. Çunke ma her ca de Mexmûrî ra bigêrê heta Dêrsimî mîyanê şerî de yê. 

No proes prosesê merg û mendişî yo. Wa pêro embazî ney hol fam bikerê û goreyê ci têbigêrê. Heta ke ser bikewê embazê ma ganî erkê xo ser de bibê. Ganî embazê ma prosesê nikayênî yê na dinya zî hol biercnê û fam bikerê. Ganî gerîlayê dewrê neweyî goreyê şertanê nê dewrî têbigêrê, metodê xo yê têgêrayîşî bivurnê û bieşkê xo rêxistin bikerê. Gerîlayê dewrê neweyî ganî bizanê xo binimê, sey embaze Sara û Rûkene bieşkê şaristanan de bi nimitkî bigêrê yanî gerîlayê Çi zimistan çi hamnan, gerîlayî şinê ça wa uca de binê erdî de xo rê mewzîyan virazê. 

Ewro gerîlayê Zap, Avaşîn û Metîna û bi çalakîya xo embaz Sara û Rûkene milîtanîye de û xoverdayîş de resayî asta tewr berze. Gerîlayê Vakurê Kurdîstanî bizanê ke ê bi xo pawitiş û xoverdayîş ê. Ganî gerîlayê Vakurî hetê îdeolojîk û mentalî ra zî xo bipawê. Ganî ma vera dafik, îstîxbarat û hêrişanê dişmenî hayîdar bibê û tedbîranê xo bigêrê.  Ganî çalakîyan de taktîkê suîkast û sabotajî esas bibê. Gerîlayê Vakurî zî sey gerîlayanê Herêmanê Pawitişî yê Medya ganî nê taktîk û metodî esas bigêrê. Wa gerîlayê Vakurî hînî zimistanî reyde xebata mendişî bikerê. Wa her kes cayê xo dîyar bikero. La ganî ma bizanê ke dişmen ge ge cayanê ma deşîfre keno. Coka her kes cayo ke par tede mendo bivurno.  Zimistanî di erkê esasî est ê; pawitişo fîzîkî û pawitişo mental-îdeolojîk. Embazî wa embazanê bînan, fermandaranê xo bipawê. 

Ma bi îdîayêka pîle bi sozê serkewtişî dest pê serrêka newîye kenê. Wa embazî goreyê ney amadekarîyanê xo bikerê. Ma Botan de zaf şehîdan danê, wa embazî bala xo bidê ney ser. Kadroyê ma yê Herêmanê Pawitişî yê Medya zî ganî hîna bi mesuldarî nêzdîyê erkanê xo bibê. Her kes kêmasîyan û xeletîyan bivîno û nînan safî bikero. 

Ma pê bawer ê ke embazê ma xeta Rayber Apoyî de bi girîngî nêzdîyê erkanê xo do bibê. Caardişê azadîya Rayber Apoyî û azadîya Kurdîstanî, rijnayîşê rejîmê faşîstî esasê ma yê. Rayraşîyayîşê azadîye yê Rayber Apoyî rayraşîyayîşê azadîya şaran o zî. Wa embazî bi na hişmendî seba serkewtişî çi hewce yo bikerê. 

Nê esasî ser o ma pêro embazan bi heskerdiş û rêzî selam kenê. Ma pêro embazan rê zerrî û ganî ra serkewtiş wazenê.''