Endama Koordînasyonê PAJKî Raperîne Munzur cewab da persanê ANFyî û hêrişê îşxalî yê dewleta tirke yê vera Zap, Metîna û Avaşînî ercnayî.

Qiseykerdişê Munzure ra beşêk wina yo:

''Gerîlayê azadîye seba ke erd, rûmet û estbîyayîşê kurdan bipawê Başûrê Kurdîstanî de xo ver danê. Gerîlayê azadîye pê hîşmendî, îrade û hêzê Serek Apoyî nê xoverdayîşî rê dewam kenê. Bingeyê hêzê ma no yo.

Nê hêrişî seba îşxalê Başûrî yê. Têna gerîlayî, PKK vera ney xo ver danê. Gerîlayî seba pawitişê destkewteyanê şarê Başûrî şer kenê û ganê xo feda kenê. No şer mabênê dewleta tirke û PKKyî de nîyo. Dewleta tirke wazena sînoranê xo hîra bikera coka hêrişê Başûr, Rojawan û Şingalî kena. Îdareyê Herêma Kurdîstanî wina mojneno ke seke nê hêrişî rîyê PKKyî ra semed qewimîyenê. 

Dewleta tirke wazena kurdan qir bikera, a xo sey efendîya kurdan vînena.  Ma pê zanenê ke xeylêk hêzî peyê nê armancê qirkerdişî yê Tirkîya de yê. PKK a partî ya ke bi mîlyonan kesî paştî danê ci û têgêrayîşê PKKyî vera zulm, îşxal û qirkerdişî şer keno. PKK bi vengê cinîyan, vera DAÎŞî şer kerd. Ma vajê Tirkîya wazena PKK çin bikera la şar gelo destûr bido ney? La qey PKK têgêrayîşêko Kurdîstanî nîyo? Êyê ke nê hêrişan kenê meşrû wayîrê hîşmendîya dişmenî yê. 

Hayîya ma pê armancê îşxalî yê dewleta tirke esta. PKKyî ra nêbo no armanc bi lezêr yeno caardene. Dewleta tirke DAÎŞ şuxilna la nêeşkaye PKK bin bikera, dima aye bi xo hêrişî kerdî la reyna zî nêeşkaye. Rixmê aye sempatîzanê PKKyî dinya ser o zêdîyenê. Xoverdayîşê şarê ma ney mojneno.

Rejîmê AKP-MHPyî faşîst, îşxalker û dişmenê kurdan o. Rejîmê Erdoganî semedê destkewteyanê kurdan  terseno. Tehamulê ci çin o ke kurdî şinasîyenê, resayî hîşmendîyêke, eşkenê xo îdare bikerê. O estbîyayîşê xo qirkerdişê kurdan de vîneno. Seba ke xo binkewtişê Garê ra bixelisnê nê hêrişî dayî destpêkerdene.

Tirkîya key zere de teng biba hêrişê kurdan kena. Ganî şarê Başûrî ney bivîno, esasê yewîya neteweyîye ser o vindero. Eqsê ci vera kurdan sûc o. Erdogan cayanê îşxalkerdeyan ê Rojawan û Sûrîye de hema zî cerganê DAÎŞî şuxilnena.

Cinî û şarê kurdî vera zulmê dewlete, vera hêrişan xo ver danê. Xora nê xoverdayîşî ra nêbîyêne îqtîdar hende qels nêbîyêne. Erdogan seba ke verê nê xoverdayîşî bigêro çew nêmend ke ver gêrayo ci û tim tawîzî dayî. Rejîmê Erdoganî xo rê vano 'mîllî' la vera ma tim beranê hêzan ê mîyanneteweyîyan ra gêreno. 

Şorişgêr, demokratê Tirkîya ganî hîna xurtî wayîrê têkoşînê Mahîr û Îboyan vejîyê û zêdêr hetê şarê kurdî de bibê. Têkoşînê ma seba azadîya komelê Tirkîya yo zî. Ganî pêro hêzê demokrasî û şorişgêrî mesuldarîya xo bîyarê ca û têna partîyanê sîyasîyan ra muxalefet nêpawê. 

Gerîlayî destê ci ra çita yeno kenê. No şer şerê azadîya şarî yo. Nê şerî de vateyê 'paştdayîşê gerîlayan, destekî' xelet ê. Gerîlayî Kurdîstan pawenê, vera faşîzm û îşxalî şer kenê. No wezîfe wezîfeyê pêro kurdan o, têna ê gerîlayan nîyo. Ma mecbur ê ke pê şerê şorişgêrî yê şarî cewab bidê dişmenî. Eke azadîye çin ba cuye zî çin a. Linga komelî ya nê şerî hewceyê tewirêkê bihêzêrî. Bi taybetî na babete de wezîfeyê pîlî kewenê ciwanan ser.

Têkoşînê gerîlayan, têkoşînê PKK-PAJKî rejîm ard verê rijîyayîşî. Êyê ke emrê ma ser o hesaban kenê, vanê 'hê qedîyenê' tarîxî ra qetî ders nêgênê. Têkoşînê nê şarî zaf îqtîdarî rijnayî. No têgêrayîş yew nasname yo. 

Gerîlayî do rayîr nêdê îşxalkeran û peynîya rejîmê faşîstî yê AKP-MHPyî bîyarê. Ma nêmseserre ra nata vera nê sîstemê qirker û wehşîyî xo ver danê. Ma kenê ke şarê xo û welatê xo bipawê,  şertanê cuya azade awan bikerê.''