Vizêr Amed de bi beşdarîya KCD, DBP, Partîya Çep a Keske, Partîya Azadîye, Partîya Komunîste ya Kurdîstanî (KKP), Partîya Sosyalîste ya Kurdîstanî (PSK) û Partîya Azadîye û Merdiman (PÎA) û xeylêk roşnvîran Konferansê 'Serra 100. ya Peymana Lozanî de Kurdîstan û Kurdan' amebî kerdene. Netîcenameyê Konferansê Lozanî Amed de bi kombîyayîşê çapemenîye ame eşkerakerdene.

Eşkerayîya kurdkî hetê Vervatoxê KKPyî Nusrettîn Maçînî ra ameye wendene.

Eşkerayîye de ame parekerdene ke pê Peymana Lozanî estbîyayîşê kurdan û Kurdîstanî ameyî redkerdene û qirkerdişê kurdan dîya destpêkerdene. Eşkerayîye de bale ameye antene hêrişanê vera destkewteyanê kurdan, rejîmê qeyûman, dewaya qefilnayîşê HDPyî û operasyonanê qirkerdişê sîyasîyî ser.

Eşkerayîye wina dewam kerd: ''Rixmê nê kerdişan zî xoverdayîşê şarê ma bêmabên dewam keno. Şarê ma Rojawan û Başûrê Kurdîstanî de wayîrê statuyêkî yo. Vakur û Rojhelatê Kurdîstanî de zî şarê ma mewzîyê girîngî vistî destî. 

Înkar û dişmenîya dewleta tirke yê vera kurdan zî bîyî sebebê krîz û şeran. Nê prosesî de ewro Tirkîya hetê ekonomî ra rijîyaya, sîstem teng bîyo. Çaresernêkerdişê meseleya kurdan teyna mesele kerdo giranêr. Heta ke meseleya kurdan bi haştî û têdûştî nêra çareserkerdene herême de haştîye, aramîye û refah nênê destvistene. Hînî rejîmo tekperest zî rijîyayo. 

Ganî bi Qanûnê Bingeyî yê neweyî heqê kurdan bêrê dayene, estbîyayîşê kurdan bêro şinasnayene û kurdkî sey ziwanê diyînî bêro qebulkerdene. Na babete de erko verên keweno milê aktoranê sîyasîyan. Azadîye nêna bexşkerdene coka seba ci têkoşînê goreyê nê çaxî û stratejîya neteweyîye lazim ê. Kurdî ganî îtîfaqê xo yê neteweyî hîra bikerê û bi nê hawayî heqê pêro zehmetî û astengîyan ra bêrê. 

Sere de Îngilîstan û Fransa ma venga pêro îmzadaranê Peymana Lozanî danê ke wa peynîya na neheqîye bîyarê û paştî bidê kurdan ke qederê xo bi xo dîyar bikerê. Kurdî wazenê cografyaya xo de bi haştî û aramî biciwîyê. 

Ma venga dewleta tirke danê ke sîstemê înkar û îmha ra fek vera bida û meseleya kurdan bi rayîrê haştîye û demokrasî çareser bikera.''