3 mengan ra nata şewatê Koyê Cûdîyî rê mudaxele nêno kerdene. Wekîlê HDPyî yê Şirnexî Hasan Ozguneş  verê bînaya HDPyî de çalakîya roniştişî ya 3 rojan keno. Ozguneş roja diyîne de çalakîya xo rê dewam keno. Ewro Meclîsê Cinîyan ê HDPyî, rêxistinê HDPyî, TJA û Mayê Haştîye tewrê çalakîye bîyî.

Çalakîye de pankartê bi nuşteyê ''Cûdî tarîx o, tarîx mêveşne'' û ''Daristanî vêşenê selahîyetdarî peygoş kenê.'' ameyî akerdene.

Ozguneşî çalakîye de qisey kerd û vat: ''Dewlete daranê ke pê vêşnayîş nêeşkena çin bikera danê qoricîyan ke bibirnê. Terefgîranê AKP-MHPyî bi îmkananê polîsan hêrişê ma kerd. Provokasyon kerd. Hêzê tarîyî wazenê ke bi rayîrê provakasyonan Şirnex bêtesîr bikerê. Şarê Botanî şarêko rûmetên o. Ma do wayîrê nasname, xoza, demokrasî û azadîya xo vejîyê. Wa Şirnex pê provakasyonan mexepîyo. Wa hînî hêzê dewlete daristananê ma nêvêşno.''

Ozguneşî venga şarî da û vat: ''Têkoşînê ma rojane nîyo. Ma do heta peynî xozaya xo bipawê, seba haştîye têkoşîn bikerê. Ma do siba çalakîya xo dewam bikerê. Wa şarê ma zî bibo vengê daristanan.''