Koordînasyonê PAJKî bi wesîleya serrgêra Komployê Mîyanneteweyî yê 9ê Teşrîna Verêne ya 1998î eşkerayîyêke daye. Eşkerayîye wina ya:

''Pê hemleya pîle ya Rayber Apoyî tarîxê Kurdîstanî çinbîyayîşî ra xelisîya û verê xo da estbîyayîşî. Armancê na hemle caardişê estbîyayîşê kurdan û cuya azade bîye. Semedê caardişê nê armancî zî xo resna krîterê azadîya cinîyan o ke şerto bingeyî bi. Rayber Apoyî nê esasî ser o îfade kerd ke şorişê azadîya cinîyan şerto destpêk ê şorişanê merdimîye yo. Hegemonyaya kapîtalîste ya rojawanî bi komployî cewab da ney. Komployê le Rayber Apoyî rê ame ferzkerdene, îtîrafê tersê vera nasnameyê azadî yê şarî bi.

Rayber Apoyî semedê xatirê çarenusê şarêkî hesreta xo ya 40 serre ya koyan ra fek vera da, semedê çareserîya demokratîke ya meseleya kurdan verê xo da rojawanî û 9ê Teşrîna Verêne ya 1998î de Şamî ra vejîya. Eşkera yo ke Rayber Apoyî semedo ke zerar nêreso nê welatî qebul kerd ke Sûrîye ra vejîya û hûrmetêko pîl mojna krîterê dostanîye.

Komployo Mîyanneteweyî rayberîya Amerîka de ame plankerdene û gama destpêke zî Yunanîstan de ameye eştene. Hetê Rûsya ra semedê xatiê menfaatan ê madîyan dîya dewamkerdene, Îtalya de bi hawayêkê dergî dîya dewamkerdene û Kenya de ame qedînayene. Temamîya nê prosesî de dostanîya sexte, kêmasîya embazîye bîyî wayîrê rolî.

Rayber Apo 23 serrî yo îşkencexaneyê Îmraliyî de mîyanê şert û mercanê ke Prometeus amebi mixkerdene xo ver dano. Mîyanê nê şert û mercan de Îmrali de şero tewr pîl ê nê dewrî yeno kerdene. Sîstemê Îmraliyî sîstemê tênaverdayîşî yo mutleq o. Cayo ke cuye mergî rê ameya mehkumkerdene. Famkerdişê şerî yê Rayber Apoyî şerto bingeyî yê cuya azade.

Pê rayîrê komployî Rayberê ma Zîndanê Girawa Îmraliyî de ame caakerdene, mehkumê tênatîya tarîxîye ame kerdene û ame waştene ke têkilîya ci ya bi komelî û merdimîye bêra qedînayene. Girawe taybetmendîyanê xo yê xozayîyan ra semed cayêko îzolekerde yo. Şert û mercê tecrîdê giranî ke hetê Komara Tirkîya ra yenê caardene wazena ke têkilîya Rayberê ma bi her hawayî dinya ra bêra qerifnayene.

Rayber Apoyî 23 serran de sîstemê Îmraliyî pûç kerd û xo rensa komel. Ey pê bawer kerd ke komel ey têna nêverdeno û nameyê pêro merdimîye ser o vera hegemonyaya dinya xo ver da. Xeta merg-kiştişî ya komplotî bi fedakarîyanê pîlan ê Rayber Apoyî ameye pûçkerdene. Rayber Apoyî Îmrali de bingeyê bîyayîşê hîrêyînî û bingeyê Modernîteya Demokratîke awan kerdî.

Ma dekewtişê serra 24. ya komployî de sey PAJKî komployî û komplogeran şermezar kenê. Şexsê embaz Halît Oral û Aynure Artan de ma şehîdanê 'Şima nêeşkenê tîja ma tarî bikerê' bi rêx, hûrmet û minetî yad kenê.

Paradîgmaya Rayber Apoyî tek metoda cuye ya ke ma do pê cuya azade awan bikerê. Roşnîya ma ya azadîye ya, estbîyayîş, nefes û manaya ma ya. Heskerdiş û perwerîya ma ya bi Rayberîye, îdîaya ma ya bi raştîya Rayberîye pîl ê. Na îdîa îdîaya azadîya ya PAJKî ya. Serra 2. ya Hemleya 'Vera qirkerdişê cinîyan wext wextê pawitişê komelî û cinîya azade ya' de rexnedayîşo ke ma do bidê Rayberê xo, şarê xo û cinîyan şiknayîşê sîstemê Îmralîyî yo, caardişê azadîya fîzîkî ya Rayberê ma yo.

Hêrişo tewr pîl ê modernîteya kapîtalîste ya vera cinîyan ê kurdan esîrkerdişê Rayber Apoyî yo. Hegemonyaya kapîtalîste pê esîrkerdişê Rayber Apoyî zemînê hêriş, qirkerdiş, tedaya vera cinîyan awan kerd. Armancê nê hêrişan nê yê ke koletîya sîstemê camêrdan bêra xorinkerdene, heqê cinîyan bêrê çinkerdene, cinîyî newe ra bibê meta, cinîyan rê barbarîye bêra ferzkerdene û komel bêro çinkerdene.

Ma sey cinîyan heta ke Komployê vera Rayberîye meşiknê, esaretê Rayberîye werte ra nêwedarnê û mebê wayîrê cuya azade her ca de, kuçe, dew, çeper, meydan, kargeh û çalakîyan de bibê. Heta ke ma nê tecrîdî, komployî û faşîzmî merijnê ma do nêeşkê hêrişanê serdestîya camêrdan ra, kişîyayîşê cinîyan ra tacîz-tecawuzan ra û vêşnayîşê cinîyan ra azad bibê.

Komployo Mîyanneteweyî sere de bi xoverdayîşê Rayberê ma, bi xoverdayîşê şehîdan, şarê ma û partîya ma ame pûçkerdene. Hêzanê modernîteya kapîtalîste vera ney waştêne komployî newe  bikerê, pêro Kurdîstanî rê vila bikerê, temsîlkaranê têgêrayîşê azadîye yê Kurdîstanî bivisnê mîyanê çemberê komployî û herême rê gef biwanê. Hêzanê komplogeran hêrişê Rojawanî kerd. Tewr peyên 9ê teşrîna verêne ya 2019î de hêrişê Serêkanîyê û Girê Sipî kerd, îşxal kerd û waşt ke şorişî bifatisnê. Sere de Amerîka pêro hêzanê serdestan paştî daye hêrişanê Tirkîya ke welatêkê NATOyî ya. 9ê teşrîna verêne ya 2019î de ame waştene ke komplo bêro newekerdene. Bi heman hawayî bi armancê hêrişê bera Îdareyê Xoserî, Êzdatîye û kurdayetîya Şingalî 9ê teşrîna verêne ya 2020î de serkêşîya IRaq-PDKyî de peymanêke ameye îmzakerdene û ame waştene ke destkewteyê komelê êzidîyan cerganê PDKyî rê bêrê veradayene. Rîyê dişmenîya PDKyî ya vera kurdan reyna vejîya werte. Rixmê înan zî şaranê Rojawanî û komelê êzidîyanê Şingalî îdareyê xoserî de israr kerdo, xo ver da û pê averberdişê sîstemê xo cewab da komployî.

Kela xoverdayîşî xoverdayîşê gerîlayan o. Gerîlayê Azadîya Kurdîstanî 23 serrî yo vera komployî xo ver danê. Tewr peyên vera hêrişanê îşxalî yê nîsana 2021î pê xoverdayîşê destanî yê Behdînanî îdîaya azadkerdişê Rayber Apoyî resnaya zîrve û hemleya azadîye rê beşdarîyêka pîle mojnaye. Nê xoverdayîşî de serkêşîya artêşa ma ya gerîlayanê YJA-Starî, westetîya ci ya taktîkan îradeyê dişmenî şikit. No xoverdayîş sere de semedê cinîyan ê ciwanan û dadîyan, semedê şarê ma beno roşnî û serkêşîye keno. Îqtîdaro faşîst ê AKP-MHPyî xoverdayîşê azadîya Kurdîstanî yê bi paradîgmaya Rayber Apoyî de peynîya xo vîneno û keweno prosesê rijîyayîşî.

Sey PAJKî nîşaneya serkewtişî ya hemleya ma pîlkerdişê prosesê rijnayîşê îqtîdarê faşîstî yê AKP-MHPyî, rijnayîşê faşîzmî, caardişê azadîya Rayber Apoyî yo. Xeta ma ya serkewtişî no yo. No serkewtiş tek şertê azadîya cinîyan o. No serkewtiş şertê cuya azade û krîterê exlaqî yo.

Nê esasî ser o ma pêro cinîyan, ciwanan, şarê kurdî, şoreşger-sosyalîst û demokratan, dostanê kurdan, şaranê ke esasê konfederalîzmê demokratîkî yê dinya ser o wazenê bêrê pêser selam kenê û veng danê ke vera komployê serê Rayber Apoyî wayîrê tewirêkê eqlexî bibê. Tewiro exlaqî serûberkerdişê çalakîyan û pirodayîşê serdestîya camêrdan û faşîzmî yo. Nê esasî ser o ma veng danê ke semedê azadîya Rayber Apoyî çalakîyanê topyekûna bidê destpêkerdene, Hemleya 'Vera qirkerdişê cinîyan wext wextê pawitişê komel û cinîya azade yo' biresnê serkewtişî, pê berzkerdişê çalakîyanê azadîye faşîzmî birijnê û rayberîya cinîyanê Kurdîstanî de cuya azade biafernê.''