Qezaya Pasûro ke çimeyê ci yê tebîî yê awe estî û 33 dewanê ci de meseleya awe esta. Qeza de roje de 2 saet û nêm awe yena veradayene.  Hemwelatîyê ke pê heywankarî û zîretî debara xo kenê, wazenê wa mesele çareser biba.

Dewa Şêxbûba ra Mehmet Şah Çaçanî ard ziwan ke DÎSKÎ semedê çareserîya mesele çîyêk nêkena û vat: ''15 rojan de rey awe yena.  70 keyeyî estê, 2-3 depoyî estê. Ma nêeşkenê pê awa 2 saetan îdare bikerê. Zimistan zî heman mesele esta. Baxçeyê ma estê, heywanê ma estê. Ma pê awe pakî kenê, werd virazenê.  Ma semedê çareserîye mudirê DÎSKî rê telefon ker la mudirî vat 'Ma nerehet mekerê. Ez heta şanî xebitîyena.' Ma mexdûr ê. '' 

Dewa Havingî ra Seraye Yildiz û Siddike Yildiz zî vera mesele nêrazîbîyayîşê xo mojna û vat: ''Qeyûmî ra verî ma meseleyê xo berdêne şaredarîye la nika ma nêeşkenê xo biresnê çewî. Wexto ke awe çin a cuye zî aramî zî çin ê.''

Dewa Zileka Xirabe ra Şahîn Çelîkî vat: ''Her keyeyî rê 4-5 ton awe dîyena. Ma nêeşkenê 15 rojan pê na awe îdare bikera. Çew goş nêdano waştişanê ma.'' 

Mudirê DÎSKî yê Pasûrî Melîh Îpekî îdîa kerd ke hemwelatîyî mesele 'manîpule' kenê û qetî 'meseleya awe çin a.'