Meclîsê Cinîyan ê DEM Partî merkezê partîye de kom bi. Vervatoxa Meclîsê Cinîyan ê DEM Partî Halîde Turkoglu kombîyayîşî ra verî qisey kerd.

Halîde rojnamegerî Nazim Daştan û Cîhane Bîlgîn yad kerdî û vat ke înan kamera û qelemê xo kerdê şahîdê xoverdayîşê Rojawanî.

Halîde îfade kerd ke ê do tim wayîrê destkewteyanê cinîyan ê Rojawanê Kurdîstanî vejîyê û vat: ''Ma do wayîrê cuya cinîyan ê azadîgîran vehîyê. Têkoşînê vera hêrişanê serê Rojawanî rojdemê ma yo esas o. Îqtîdar bi nê hêrişan dişmenîya vera kurdan keno. Ma do destûr nêdê ke cinîyî ancî bêrê rotene û kolekerdene. Gefê vera Rojawanî gefê vera ma yê. 

Rayîrê awankerdişê haştîyêka rûmetêne bi wedarîyayîşê tecrîdî abeno. Eke tecrîd bêro wedaritene seba çareserîya meseleya kurdan zî berî do bêrê akerdene. Ne şîdetê vera cinîyan wina çareser beno ne zî haştîye yena. Îqtîdaro ke 22 serrî yo tecrîd ano ca hinî îflas kerdo.

Roje roje pîlkerdişê paştdayîşê bi Rojawanî ya. Pawitişê şorişê cinîyan ê Rojawanî pawitişê haştîye, azadîye, têdûştîye, cuye û xoza yo.''