Endama Konseya Serekîya Pêroyî ya KCKyî Sozdare Avesta beşdara bernameyê taybetî yê Stêrk TVyî bîye û rojdem ercna.

Sozdare Avesta verî Komployo Mîyanneteweyî yê 9ê Teşrîna Peyêne şermezar kerd û şehîdê 'Şima nêeşkenê roja ma tarî bikerê' yad kerdî.

Qiseykerdişê Sozdare Avesta ra beşêk wina yo:

''Rayberê ma 23 serrî yo binê tecrîdêkê giranî de yo. Ma do qetî nê komployî xo vîr a nêkerê. Hêzanê mîyanneteweyîyan semedo ke Rayber Apo verê plananê xo de sey astengî dîyo no komplo kerd. Rayber Apo 23 serrî yo zîndan de semedê şarê xo xebitîyeno.  Rayberîye vera armancanê hêzan ê mîyanneteweyîyan de mîyanê xoverdayîşêkê pîlî de yo.

Gerîlayê azadîye hê destanan nusenê. Xoverdayîşê Zendûra, Mamreşo û Girê Sorî tarîxê merdimîye û Kurdîstanî de nika ra cayê xo girewt. Semedo ke gerîlayê azadîye îqtîdarê AKP-MHPyî rijnenê vera înan çeka kîmyewîye şuxilîyena. Nê çekê qedexekerdeyî cayêkê bînî de biameyêne şuxilnayene dinya weriştêne payan ser. La semedo ke NATO paştî dano Tirkîya çew vengê xo nêkeno. Ganî şarê ma vera ney tewirê xo bimojno, wayîrê gerîlayan vejîyo. Ma dî şarê ma Strasbourg de senî bi hedefê hêrişê polîsan. Dewleta tirke hêzê xo ney ra gêna. Yewîya Ewropa bi nê hawayî wayîra Tirkîya vejîyena.

Şarê Kurdîstanî, şarê Tirkîya, hêzê enternasyonalîstî, dostê ma û dişmenê faşîzmî ganî vengê gerîlayan bidê eşnawitene û vera dewleta tirke têbigêrê. Semedê muhakemekerdişê Erdogan û Bahçelîyî wa têbigêrê. Senî ke gerîlayî xo ver danê wa şarê ma zî wina xo ver bido. Pê têkoşînê şar û gerîlayan do dişmen erdî ra bêro vetene.

PDK bi hawayêkê eşkerayî paştî dano şerê vera gerîlayan. PDKyî tewr peyên Xelîfan de embazê ma şehîd kerdî. No tewirê PDKyî tewirê dişmenan o. PDK xizmetê yewîya neteweyîye, xizmetê şarê kurdî û Kurdîstanî nêkeno. PDK wazeno Kurdîstanî de se bikero? Kamî çi soz dayo ci? PDK pê dormegirewtişî gerîlayan bênefes verdeno û wazeno gerîlayan tasfîye bikero. Eke PKK bêro tasfîyekerdene qetî dore do bêra PDKyî. Coka wa dişmenîye ra fek vera bido.

9ê teşrîna verêne serrgêra peymana PDK-hukmatê Iraqî ya serê Şingalî ya zî. Şarê Şingalî vera na peymane payan ser o yo. Na peymane fermano 74. o. Semedo ke PDKyî 2014 de ê war verdayî êzidîyî hînî pê nê hêzan bawer nêkenê. Rojanê peyênan de ê pê bahaneya weçînayîşî xîret kenê ke pê hêzanê xo yê çekdaran û bêbextan debikewê Şingalî. Hînî nê şarî ra fek vera bidê. Dewleta tirke hertim cara hêrişê Şingalî kena. Şarê êzidîyî hînî raştîyan zaneno û vera nê hêrişan xo ver dano. Şarê êzidîyî zî wazeno weçînayîşo demokratîk bêro kerdene. Ê do bire bidê ke kamî xizmetê înan bikerê. Xoverdayîşê şarê Şingalî yê vera peymana 9ê teşrîna verêne zaf ercîyaye yo. Weçînayîş de zî şarê Şingalî goreyê ney tewirê xo do bimojno.''