Qezaya Pulurî ya Dêrsimî de Çimeyanê Munzurî de 5ê tebaxe ra nata binê nameyê 'projeyê peyzajî' de makîneyê karî her ca texrîb kenê.  Yeno plankerdene ke serê Çemê Munzurî de pirdî, çimeyan de zî cayê pîknîk, otoparkî virazîyê. 

Ocaxê Derwêş Cemalî ra Pîr Ahmet Şanliyî  projeyê peyzajî ser o Çimeyanê Munzurî de cigêrayîş kerd. 

Şanliyî cigêrayîşanê xo ser o vat: ''Mesele hînî eşkera bena. Dûştê Munzur Babayî de dergahêk estbi. Uca ame rijnayene. Malozî hema zî herinda xo de yê. Cyo ke awe tira hêrikîyena, pê beton ameyo girewtene. Coka hêrikîyayîşê awe binî ra vurîyayo. Înan vat ke do têna kişta rayîrî de cayê standî virazê la rayîrî ra ver bi koyî qasê 10-15 metreyan erd kinito. Texrîbato Çimeyan bi hawayêkê kifşî vejîya werte.''

Şanliyî da zanayene ke warê roniştoxanê dewe zî pê betonî gêrîyayo û vat: ''Nê xebatî çarçewa rantî de yenê kerdene.Key vera texrîbatê Çimeyanê Munzurî nêrazîbîyayîşî kêmîyayî armancê înan ê esasî xo eşkera kerd. Warê bawerîye vurîyayî bîyî warê rantî.''