Komîteya Rayberdişî ya PKKyî bi wesîleya serrgêra Komployê 9ê Teşrîna Verêne eşkerayîye daye.

Eşkerayîye wina ya:

''Ma kewenê serra 24. ya Komployê Mîyanneteweyî yê 9ê Teşrîna Verêne ya 1998î ke vera Rayberê Şarê Kurdî Abdullah Ocalanî û şexsê ci de vera îradeyê kurdana amebi kerdene. Hêzê komplogerî 23 serrî yo pêro rayîr û metodan xebitnenê û xîret kenê ke Rayber Apoyî û estbîyayîşê kurdanê azadan çin bikerê. Ma zî sey şar û têgêrayîşî 23 serrî yo vera komployî rayberîya Serek Apoyî de bi çêrî xo ver danê. Nê xoverdayîşî de ma zor û zehmetîyê pîlî, dejê giranî antî la destkewteyê tarîxî zî vistî destî. Mîyanê 23 serranê xoverdayîşî de ma bi des hezaran şehîdê çêrî dayî.

Bi wesîleya serrgêrêka newîye ma xoverdayîşê Îmraliyî yê tarîxî û xoverdayoxanê 'Şima nêeşkenê tîja ma tarî bikerê' selam kenê. Şexsê embaz Halît Oral û Aynure Artan de ma şehîdanê çêran ê xoverdayîşê vera komployî bi rêzdarî û minetî yad kenê. Nameyê şar û têgêrayîşî ma vanê ke serra 24. ya komployî de ma do bi xurtî xo ver bidê û ser bikewê.

Seke zanîyeno Komployo Mîyanneteweyî yê 9ê Teşrîna Verêne hêrişêko gemarino sîyasî bi ke semedê qirkerdişê kurdan amebi kerdene. Pê îmhakerdişê Rayber Abdullah Ocalanî û tasfîykerdişê PKKyî ameyêne waştene ke verê çareserîya demokratîke ya meseleya kurdan bêro girewtene û bi nê armancî qirkerdişê kurdan bêro temamkerdene.Na çarçewe de dişmenê estbîyayîşê şarê kurdî, dişmenê çareserîya demokratîke ya meseleya kurdan û dişmenê cuya azade bi. Înan waştêne ke serê bingeyê qirkerdişê kurdan de serwerîya hêzanê kanwazan ê Rojhelatê Mîyanênî û dinya de bimanê. Bêguman netîceyê nê hêrişan semedê şarê kurdî û pêro şaranê Rojhelatê Mîyanênî xeylêk giran bîyî. Labelê xoverdayîşê pîlî yê 23 serran ê vera komployî nêverda ke komplogerî biresê armancanê xo.

Seke zanîyeno Komployo Mîyanneteweyî hetê îdareyê Amerîka ra ame plankerdene û caardene. Semedê servistişê komployî dewletê NATOyî, kanwazê dinya û herême, hêzê kurdî yê xayînî û ajanî ameyî şuxilnayene. Çarçewa Şerê Dinya yê Hîrêyînî de parçeyo tewr girîng ê mudaxeleyê Amerîka vera Rojhelatê Mîyanênî bi. Labelê qet yew hêzo komploger nêeşka armancê xo bi temamî ser bivisno. xoverdayîşê çêrîya kurdan a bi rayberîya Serek Apoyî nê armanc û pêro hesabî bin vistî.

Hêzê komplogerî semedê tasfîyeya Rayber Apo û Têgêrayîşê Azadîye yê Kurdan 23 serrî yo pêro rayîr û metodan xebitnenê. Îmhakerdişî ra heta teberkerdişî, polîtîkaya xeniqnayîşî yê Îmraliyî ra heta prosesanê sexteyan ê çareserîye, hêrişanê topyekûnan ra heta vêşnayîş û rijnayîşî tewir bi tewir metodî ameyî ceribnayene. Labelê şarê kudî serkêşîya Rayber Apoyî û hêzanê demokratîkan de bi xoverdayîşêkê raştî û bitesîrî pêro metodî pûç kerdî û kerd ke komplo ser nêkewo.  Nê xoverdayîşê 23 serran metodî û xeylêk planê AKPyî pûç kerdî. Her safha de hêrişê komplogerî şikîyayî, hêvîya azadîye hertim xurt kerde. Hêzê komplogerî zî bin kewtî.

Ma nika kewenê serra 24. ya Komployê Mîyanneteweyî û xoverdayîşê 'Şima nêeşkenê tîja ma tarî bikerê'. Netîceyê girîngî yê 23 serran werte de yê. Amerîkaya ke bira komployî daya û serkêşîya ci kerda verê averşîyayîşanê Kurdîstanî û Rojhelatê Mîyanênî de mat menda. Semedo ke fam bikera ça de şaşîye kerda persan persena. Ma reyna bi eşkera vanê ke Amerîka şaşîya pîle, neheqîya tewr pîle pê Komployê Mîyanneteweyî yê vera Rayber Apoyî kerda. Amerîka bi nê hawayî krîteranê xo yê bi nameyê 'Krîteranê Wilsonî' binpay kerdî. Coka ganî Amerîka şaşîtîya xo ya tarîxî sereraşt bikera û kurdan rê deynê xo yê uzrî bida.

Îdareyê Husnu Mubarekî yê Misirî û Îdareyê PASOKî yê Yunanîstanî ke bi hawayêkê aktîfî komplo de ca girewt nika werte de nîyê. Heta Îdareyê Boris Yeltsinî. Aqîbetê nê hemkaranê komployî werte de yê. Eşkera yo ke îdareyê nikayênî yê pêro welatan deyndarê kurdan ê ke uzrê xo biwazê û şaşîtîyanê xo raşt bikerê.

Rewşa dewleta tirke û îdareyê AKPyî yê ke gardîyanê komployî yê werte de yê. Bulent Ecevîto ke caardişê komployî de Tirkîya de vernî de bi, aqîbetê ci werte de yo. Înan ne komplo fam kerd ne zî netîceyê ci texmîn kerdî. Bi nê hawayî bedelê girnaî dayî. Kesayetê Erdoganî rewşa ci werte de ya, o xîret keno ke pê Devlet Bahçelî, Hakan Fîdan, Suleyman Soylû û Hûlûsî Akarî payan ser o vindero. Labelê eşkera yo ke vera xoverdayîşê azadîye yê kurdan de o zî bin keweno. Erdogan bi xo Tirkîya arda verê rijîyayîşî. Eşkera yo ke binkwtişo mutlaq ê komployî do sîyaset û hişmendîya faşîste ya Tirkîya çin bikero.

Bêguman hêzo tewr binkewte yê komployî kurdê ajan û xayîn ê. Şexsê PDKyî de eşkera bîyo de na rewşe resaye kamyew asre. Ê hêzanê faşîst-qirkeran ê dişmenê kurdan reyde bîyî yew û hêzanê azadîye erzenê guleyan ver, înan qir kenê. Reyna kifş bîyo ke têkoşînê vera sîyaset û hişmendîya faşîste-qirkere têkoşînê vera xayîn-ajanan ra cîya nîyo. Nê esasî ser oşexsê şehîdanê Xelîfanî de ma şehîdanê xoverdayîşê vera îşxalê Heftanîn, Metîna, Zap, Avaşîn, Zagros û Xakurkê bi rêz û minetî yad kenê. Ma venga şarê xo danê ke xeta şehîdanê çêran de bi xurtî şoro.

Mîyanê xoverdayîşê 23 serran ê vera Komployê Mîyanneteweyî de eşkera yo ke Rayber Apoyî senî averşîyayîşê pîlî afernayê. Bîyayîşê Rayberîye yo Hîreyîn mîyanê xoverdayîşî de qewimîya û Rayber Apo bi rayberê global. Teorîya Modernîteya Demokratîke na raştîye vana. Netîceyê pratîkî yê nê averşîyayîşan Kurdîstan, Rojhelatê Mîyanênî û dinya de her ke şino benê zelal.

Şarê ma zî waştiş û hişmendîya cuya azade mîyanê xoverdayîşê 23 serran ê vera komployî de xurt kerdê. Hêzanê ma yê gerîlayan mîyanê nê prosesî de çend reyî îsbat kerd ke ê do bin nêkewê. Şorişê Azadîye yê Cinîyana ke garantîya serkewtişî û raybera têkoşînê ma ya, averşîyayîşê xo yo tewr pîl nê 23 serran de kerd. Ciwanê kurdî hertim bîyî hêzê bingeyî yê têkoşînê 23 serran ê vera komployî. Têkoşînê 23 serran averşîyayîşê girîngî û manadarî yê tarîxî afernayî ke Şorişê Rojawanî mîsalê ney o.

Seke Rayber Apo tim vano karê ma yê 23 serran eyneyê karê ma yê serra 24. o. Eşkera yo ke têkoşîno tewr manadar û pîl ê vera Komployê 9ê Teşrîna Verêne, têkoşîno tewr pîl ê vera versîyonê nê komployî yê serranê 2019-2020î Girê Sipî de, Serêkanîyê de û Şingal de do serra 24. de do bêro kerdene. Hemleya Wextê Azadîye ke semedê azadîya Rayber Apoyî yena kerdene, hertim do bêra xurtkerdene, bi nê hawayî sîstemê îşkence û tecrîdî yê Îmraliyî do bêro rijnayene û komplo qetî do bêro binkerdene. Pê rayîr û metodanê afernayoxan stratejîya ma ya şerê şarî û şorişgêrî do ser bikewa.

Nê esasî ser o ma reyna venga hêzanê komplogeran danê ke polîtîkayanê xo yê nikayênan ê vera kurdan newe ra biercnê. Ma venga embazanê xo yê patrîye, şarê xo yê welatperwerî û dostanê demokratîkan danê ke vera raştîya komployî xo newe bikerê û serra 24. de semedê azadîya Rayber Apoyî her ca de têkoşînê bitesîrî bikerê,  komployî bin bifînê û azadîye dest bifînê.