Komîteya Rayberdişî ya PKKyî bi wesîleya serrgêra 42. ya Xoverdayîşê Rojeyê Mergî yê Pîlî yê 14ê Temmuze eşkerayîya nuştekîye daye.

Eşkerayîye de şexsê Mehmet Hayri Durmuş, Kemal Pir, Akif Yilmaz û Alî Çîçekî de şehîdê têkoşînê azadîye yê Kurdîstanî ameyî yadkerdene, xoverdayîşo tarîxî yê anor û azadîye yê 42 serran ame selamkerdene û nê ameyî parekerdene:

''Seke yeno zanayene vera rejîmê faşîst-leşkerîyî yê 12ê êlule tepişteyanê şorişgêran 14ê temmuza 1982yî de zîndanê Dîyarbekîrî ra  Xoverdayîşê Rojeyê Mergî yo Pîl da destpêkerdene. Nê xoverdayîşê tarîxî yê ke serkewtişo gird fîna dest, 42 serrî xo dima verdayî. Nê serran de Têkoşînê Azadîye yê Kurdîstanî na xeta serkewtişî de aver şi û destkewteyê girdî afirnayî.

Ma do Xeta Xoverdayîşê Fedayîyî ya 14ê Temmuze de ser bikewê

Xeta Xoverdayîşê Fedayîyî ya 14ê Temmuze ewro rayîrê têkoşînê ma roşn kena û xeta serkewtişî ya Hemleya Azadîye ya Globale bewlî kena. Têkoşînê vera zulmê faşîstî yê zîndanan, vera qeyûman, terorê faşîstan ê kuçeyan, hêrişê îşxalî yê vera Başûr û Rojawanî na xeta azadîye de yeno raryaberdene. Ma do sey têgêrayîş û şarî Xeta Xoverdayîşê Fedayîyî ya 14ê Temmuze de têkoşîn bikerê û ser bikewê. Rojdemê ma yo verên Hemleya Azadîye ya Global a. Ma kenê ke her ca de hemle aver berê. Dîktarorîya faşsîte ya AKP-MHPyî heme hêzê xo seferber kerd, hêrişê şerê taybetî rayra bena. Îdareyê Tayyip Erdoganî polîtîkaya xo ya teberî vera partî û şarê ma rayra beno. Heme îmkanê Tirkîya nê semedî ra seferber kerdî. Efrîn, Girê Spî û Serêkanîyê binê îşxalî de tepişeno û her roje ver nê waran hêrişê leşkerî keno. Reyna vera şarê Şingalî hêriş keno.

Verê Başûrê Kurdîstanî hêrişê îşxal û îlhakî yenê kerdene

Hêrişê îşxalî yê faşîzmê AKP-MHPyî yê vera Herêmanê Pawitişî yê Medya û Başûrê Kurdîstanî dewam kenê. Hêrişê îşxalî ke 26ê nîsane de vera waranê Metîna û Zapî dîya destpêkerdene 3ê temmuze ra nata sey hêrişê îlhakî yeno kerdene. Bi qebulkerdişê îdareyê Iraqî û paştdayîşê fîîlî yê îdareyê PDKyî hêrişê îşxal û îlhakî yenê kerdene. Na çarçewa de bi hezaran leşker û çeteyî, bi seyan tanq û wesayîtê zirxinî waranê Metîna û Zapî rê ameyî sewqkerdene. Verî koyê berzî ameyênî tepişene. Nika xo dewe, bajareke û qezayan de ca kenê û na çarçewe de xeylêk warê Duhokî bi fîîlî fînayo dest. Dewan vêşnenê û rijnenê, sîvîlan tepişenê ci rê zext kenê ke Metîna û Zapî bikerê veng.

PDK semedê menfeatê xo herra Başûrî roşeno

Bi sansurê çapemenîye nê kerdişanê xo nimnenê û xeberanê sey 'PKK Iraq de şewat vejeno, do çalakîye bikero' raştîyan manîpule kenê. Çi heyf ke Tirkîya û dinya zê xeberanê zûran a xapîyenî. Dewleta tirke waro dilab-hîrlab ê Gazze îşxal û îlhak kena la naye rê vengê çewî nêvejîyeno. Îdareyê Iraqî vera zext û tay menfeatan milê xo çewt kerd û tewiro sereberz nêmojna ra. Xora îdareyê PDKyî yo ke keyeyê Barzanî ra yeno pê, tim semedê menfeatê xo welatî roşeno, hemkarîye û îxanetî de resayo tîtik. Xeylêk herra Başûrî rota dewleta tirke û keno ke pêro bido ci.

Gerîlayî bi hewayêkê qehremankî şer kenê

Hêrişê îşxal û îlhakî yê ke bi îtîfaqê AKP-MHP-PDK-DAÎŞî yenê kerdene, cîdî û tehlukeyin ê. Ma sey Têgêrayîşê Azadîye yê Kurdîstanî vera nê tehlukeyî sere ra aktîf tewir girewt û ma têna bimanê zî ma têkoşîn kerd. Gerîlayê HPG û YJA Starî bi hewayêkê qehremankî vera nê hêrişan têkoşîn kenê. Bedelê girdî dayî, vera çekanê kîmyewîyan, bombayanê taktîk nukleerî xover da. Mewzîyê xo canêverdayî û semedê azadîya Kurdîstanî şer têkşîn kenê.Gerîlayê Azadîye yê Kurdîstanî têkoşînê xo de ke tede şehîdan danê, Kurdîstanî pawenê û verê îşxal û îlhakî genê. Na çarçewa de xoverdayîşê gerîlayan selam kenê û şexsê hemrayanê xo Canfeda Soro  û Cenfeda Efrînî de heme şehîdanê xo yê qehreman yad kenê.

Ganî her ca de vera hêrişanê îşxalî têkoşîn bêro xurtkerdene

Gerîlayê PKKyî  Xeta Xoverdayîşê Fedayîyî ya 14ê Temmuze de têkoşîn kenê û heta peynî do têkoşîn bikerê. La ganî têkoşîn têna gerîlayan rê meverdîyo. Wa çar leteyanê Kurdîstanî de û teberê welatî de şarê ma û dostê ma yê demokratîkî paştî bido tekoşînê gerîlayan. Bitaybetî şarê Başûrê Kurdîstanî ganî tehlukeyî hol bîvîno vera hêrişanê îşxal û îlhakî bivejîyo. Bi xurtkerdişê têkoşînî faşîzmê AKP-MHPyî û despotîzmê PDKyî gonîya ke rişnaye, tede fatisnayîş mumkun o.

Vera îşxal û îxanetî wa kurdî bibê yew

Coka roje roja têkoşînî ya, roja vera hêrişanê AKP-MHP-PDK-DAÎŞî Xeta Têkoşînî ya Fedayîye ya 14ê Temmuze de xoverdayîş û serewtişî ya. Vera îşxal û îxanetî roja pawitiş û azadkerdişê Kurdîstanî ya. Roje roja paştdayîşê Gerîlayanê Azadîye yê Kurdîstanî ya. Ganî her warî de vera hêrişan şar wirzo payan ser. Ma vera hemkarîye û îxanetî yewîya welatperweranê kurdan biafirnê. Ma yewîya sîyasîye ya demokratîke ya rêxistinanê kurdan ronê. Ma dost û dişmenanê xo hol nas bikerê û dostan rê bibê hemra û dişmenî rê bibê kalbe. Ma çarçewaya azadîya fîzîkîye ya Rayber Apoyî de Kurdîstan bikerê azad û Tirkîya û Rojhelatê Mîyanênî de yewîya demokraîtkî biafirnê.''