Komîteya Rayberdişî ya PKKyî bi wesîleya serrgêra 38. ya Hemleya 15ê Tebaxe eşkerayîyêka nuştekîye weşanaye. Eşkerayîye wina ya:

''Şarê ma yê welatperwerî û hêzanê demokratîkan rê;

Ma sey şarê kurdî 38 serrî yo têkoşînê tewr pîl û manadarî kenê. 38 serrî verî xoverdayîşê xoserîye û azadîye yo ke bi çalakîyanê Dih û Şemzînanî dest pêkerd, ewro Zap, Avaşîn û Metîna sere de, her cayê Kurdîstanî de bi çalakîyanê gerîlayan serê rayîrê serkewtiş aver şino.

Ma serrgêra 38. de Hemleya Şorişgêre ya 15ê Tebaxe ya ke herikîyayîşê tarîxî vurnayo, selam kenê. Sere de ê Rayber Apoyî ma Roşanê Gandarbîyayîşî yê 15ê Tebaxe yê pêro embazan, hemrayan, gerîlayan û şarê xo fîraz kenê. Ma şexsê embaz Egîdî de pêro şehîdanê xo bi minet û rêzdarî yad kenê. Ma reyna soz danê ke xeyalanê şehîdanê xo bîyarê ca. Ma serra 39. ya 15ê Tebaxe de her kesî rê serkewtiş wazenê.

Seke zanîyeno Hemleya 15ê Tebaxa 1984î Xoverdayîşê Zîndanan ard koyan, vist mîyanê cuye û resna her parçeyê Kurdîstanî. Na hemle vera koletî, teslîmîyet, xizmetê dişmenî û îxanetî bîye hêvî, fikrê xoserîye û cuya azade afernaye û raştîya Xeta Şorişgêre ya Apogîre îsbat kerde. Zelal o ke kurdan pêro çîyê serê xoserîye, azadî û demokrasî esasê Xoverdayîşê Zîndanan û Hemleya 15ê Tebaxe de vistî destî. Newe ra awanbîyayîşê PKKyî, serkêşîya gerîlayan, rêxistinbîyayîşê cinî û ciwanan bi nê hawayî vejîyayî werte. Nê esasî ser o serewedaritişê serranê 90an qewimîyayî. Şorişê Gandarbîyayîşê Neteweyî nê esasî ser o ame servistene û Şorişê Azadîya Cinîyan zî nê esasî ser o dîya destpêkerdene. Statuyê kurdanê Başûrî na hemle ra dima awan bi û Şorişê Azadîye yê Rojawanî sey netîceya nê şorişî qewimîya.

Tesîrê feraset û sîyasetê qirkerdişî yê serê Kurdîstanî şikîya, seba Kurdîstan, Tirkîya û rojhelatê Mîyanênî têgêrayîşêkê roşnîye awan kerd. Sey berhemêkê Rayber Apoyî, şorişê ferasetê neweyî û terzê cuye geş kerd û reyna merdimîye û rayîra ci ardî yewca. Nê esasî se ro seba merdimîye Rayberîye raştîyêke awan kerde.

Hemleya 15ê Tebaxe û xeta Apogîre mîyanê prosesê tarîxîyî de seba safhayanê girîngan bi serkewtişî derbaz bîyî.Oyo yewin parçebîyayîşê Yewîya Sovyetan o û oyo bîn zî Komployê vera Rayber Apoyî yo. Rayber Apoyî nê wird prosesî bi serkewtişî derbaz kerdî. Ey seba pêro merdimîya bindeste rayîrê azadîya demokratîke û cuya azade mojnaye û bi çimeyê hêvîyêka newîye. Hînî hêvîya azadîye her wextî ra zêdeyêr xurt a.

Têgêrayîşê ma û şarê ma hetê raştîya Rayberîye ra ameyî perwerdekerdene û bi waştişê cuya azade ameyî girêdayene. Bi taybetî cinîyê kurdî û ciwanê kurdî bîyî hêzêk ke eşkenê heqê pêro çetinîyan ra bêrê.

Têkoşînê gerîlayan seba pêro merdimîye bi mîsal û hêvî, têkoşînê azadîye yê cinîyan ê kurdan dinya de coş û kelecanêko newe aferna. Nê vîr û rêxistinkerdişê xopawitişî yê gerîlatîya cinîyan a YJA-Starî mojna ke vera hişmendî û sîyasetê serdestîya camêrdan têkoşînêko serkewte eşkîyeno bêro kerdene.

Serra 39. ya Hemleya 15ê Tebaxe de xoverdayîş koyan, şaristanan, çar parçeyê Kurdîstanî û teberê welatî de, her ca de û xeta serkewtişî de aver şino. Gerîlayê azadîye sere de Zap, Metîna û Avaşînî de waranê Kurdîstanî û metropolanê Tirkîya de bi qehremanî şer kenê, destanê xoverdayîşî nusenê, xo binê fermandarîya Egîd û Zîlane de perwerde kenê û hêrişanê AKP-MHPyî yê bi destekê NATO û PDKyî şiknenê. Ma na xeta Hemleya 15ê Tebaxe de şinê û ma her wextî ra zafêr nêzdîyê azadîye yê. Nê esasî ser o ma reyna xoverdayîşê gerîlayan selam kenê, înan rê serkewtiş wazenê û şexsê embaze Guvene Doza û Vorîn Welatî de şehîdanê ma yê qehremanan bi rêzdarî yad kenê. Ma pê bawer ê ke gerîlayî do ser bikewê.

Eşkera yo dişmeno faşîst nê hêrişanê vera Herêmanê Pawitişî yê Medya reyde hêrişanê vera Rojawanî rê zî dewam keno û her firsendî de zî hêrişê Şingal û Mexmûrî keno. Dewleta tirke xîret kena ke reyna Rojawan û Başûrî îşxal bikera coka seba bazarîye verê xo dana dewletanê sey Amerîka û Rûsya. La zelal o ke ê hînî verê rijîyayîşî de yê. Ma pê bawer ê ke hêzê azadîye û şarî do bibê yew, xo rêxistin bikerê û rijîyayîşê faşîzmê AKP-MHPyî lez bikerê. Ma pê ney bawer ê, ma wazenê ê zî bizanê ke ma paştî danê înan.

Pir eşkera yo ke şarê ma çar parçeyanê Kurdîstanî û teberê welatî de serê xeta qehremanîya 15ê Tebaxe de vera hêrişanê îşxalî û qirkerdişî bi çêrî xo ver bidê. Xoverdayîşê gerîlayanê ma yê çêran seba înan çimeyê moral û hêzî yo. Nê esasî ser de têkilî û îtîfaqê şaran û hêzanê şorişgêr-demokratan do xoverdayîşê xo tim xurt bikerê. Ma xoverdayîşê şar û dostanê xo yo  ke armancê ci azadîya Rayber Apoyî yo, selam kenê û înan rê serkewtişî wazenê.

Şarê ma û rayaumûmîye hol zanenê ke sey Rayberîye, têgêrayîş û şarî ma tim terefgîrê çareserîya demokratîke ya meseleyan ê û seba ney zî ma xeylêk xîret kerdo. La dîktatorîya AKP-MHPyî faşîzm, qirkerdiş, zulm, îşkence û îşxalî ra ber çîyêk nêzanena. Coka înan pêro îmkanê şaran seba şerê vera kurdan şuxilnayî. NATOyî ra heta PDKyî zî xeylêk hêzan paştî daye nê hêrişanê qirkeran û ê bîyî hemparê nê sûcan. Bi na wesîle ma reyna her keso ke paştî dano AKP-MHPyî, sere de PDK û NATOyî hişyar kenê. AKP-MHP verê rijîyayîşî de yo û do hesabê kerdişanê xo bido. Coka ganî çew nêbo şirîkê sûcanê înan. Na çarçewe de 300 roşnvîranê Tirkîya û 70 kesanê demokratan ê binê nameyê 'Kolektîfê Paştdayîşê bi Kurdan' eşkerayîyê girîngî dayî. Ma nê tewirî selam kenê û venga pêro kesanê demokratan danê ke vera îşxal û qirkerdişê tirkî tewirê xo bimojnê û vengê xo berz bikerê.

Nê wextî de ke ma kewenê serra 39. ya na hemle eşkera beno ke ma sey têgêrayîş û şarî  esasê stratejîya Şerê Şarî yê Şorişgêrî ra ber qet yew rayîrê têkoşîn û serkewtişî çin o. Serkêşîya gerîlayan û partîye de sey têgêrayîşanê cinî û ciwanan, sey şar û dostanê xo ma ney hol zanenê û ma do Hemleya xo ya Wextê Azadîye û têkoşînê xo yê 50 serrî xeta 15ê Tebaxe de qetî do ser bivisnê û geş bikerê. Ma serra 39. ya 15ê Tebaxe bikerê serra têkoşîn û serkewtişî.

Nê esasan ser o ma 15ê Tebaxe yê Rayber Apoyî, pêro hemrayanê xo, şarê xo û dostanê xo fîraz kenê. Ma venga şar û dostanê xo, cinî û ciwanan danê ke têkpşînê xo yê azadîye hîna zaf geş bikerê û 15ê Tebaxe bi coşî fîraz bikerê.''