Colemêrg de kerdişê Rewşa Îstîsnayîye 7 serrî yo dewam kenê. Şaristan de aktîvîte û çalakîyî qedexe yê. Hemsereka Şubeyê Colemêrgî ya Komeleya Heqanê Merdiman (ÎHD) Sîbele Çapraz derheqê babete de ANFyî rê qisey kerd û pare kerd ke şaristan de destpêkî ra nata binpaykerdişê heqanê merdiman qewimîyenê. 

Çapraze vist vîrî ke Colemêrg sînorê Rojhelat û Başûrê Kurdîstanî de yo coka dewlete tim binê nameyê polîtîkayanê asayîşî de şarî rê teda û şîdet kena. 

Çapraze îfade kerd ke polîtîkaya bêcezaverdayîşî zî bena sebeb ke şaristan de binpaykerdişê heqanê merdiman bizêdîyê. Çapraze vat: ''Şarê şaristanî verê cû sey qeçaxçî ameyêne namekerdene û raştê teda ameyêne. Nika zî verê beranê sînorî de şarî rê îşkence yeno kerdene.''

Çapraze bale ante ser ke wayîrê Kitabxaneyê Umutî Seferî Yilmaz û Endama Îdareyê Rayberdişî yê ÎHDyî Pinare Yilmaz gerre kerdbi ke keyeyê înan yeno teqîbkerdene. Çapraze vat: ''Netîceya xîretê şarî de kesêko şikdar tepişîya ke payeberzê artêşa tirke bi. La no kes cade vera dîya. Reyna Surmîye Înce wexto ke nanî berdêne domananê xo hetê leşkeran ra kişîyaye la nê leşkeran zî ceza nêgirewte. Dewlete şarê herême sey sûcdaranê potansîyelan pêşkêş kena. Netîceya nê polîtîkayanê bêcezaverdayîşî de hînî hêvîya şarî zî qedîyaya. Xora mehkemeyan de zî muhakemekerdişo edîlane çin o.''

Colemêrg de serranê peyênen de binpaykerdişê winayênî qewimîyayî:

-2020 de babîyê 9 domanan Şeralî Derelî (61) hetê leşkeran ra ame qetilkerdene la pêro leşkerî îfade ra dima vera dîyayî.

-31ê teşrîna verêne ya 2020î de Misleh Osmanî Ûrmîyeya Rojhelatê Kurdîstanî de netîceya guleyanê leşkeranê tirkan de ame qetilkerdene, birayê ci zî birîndar bi. Reyna qet yew leşkerî ceza nêgirewte.

-25ê temmuza 2023yî de Rûbarok de Serhat T. (16) û 3 şiwaneyî raştê îşkence û gefanê leşkeran ameyî. Leşkerê îşkencekerî ney la mexdûrî ameyî cezakerdene.

-25ê temmuza 2023yî de xeylêk wareyî bi bahaneya operasyonê leşkerî ameyî qedexekerdene. Şar û bêrîwanî ameyî astengkerdene, şiwaneyêkî rê îşkence ame kerdene. Şiwane Murat Çarik bi zorî ame berdene bi warê operasyonî.

-Gever de Baregehê Leşkerî yê Warkevikî de şiwaneyî S.Ç. û C.S. raştê îşkence, gef û nêngan ameyî.

-29ê gulana 2023yî de Gever de bi desan ciwanî ameyî destbendkerdene. Sereştişan de şarî rê îşkence ame kerdene. 

-26ê hezîrana 2023yî de Gever de 20 kesî bi îşkenceyî ameyî destbendkerdene û ameyî berdene bi warê operasyonî. 

-7ê hezîrana 2023yî de çawişê pisporî bi wesayîtê xo domano 5 serre E.A. qetil kerd. La çawişo pispor vera dîya.