Êlih de vera Darbeya Qeyûmî rayraşîyayîş ame kerdene. Hemserekê DBPyî Çîgdem Kiliçgun Uçar û Keskîn Bayindir, Hemşaredê Dêrsim û Amedî, aktîvîstê TJA, Mayê Haştîye, wekîlê DEM Partî, Hemşaeredarê êlihî Gulîstane Sonuk û Yeşîl Işik zî tewrê rayraşîyayîşî bîyî.

Rayraşîyayîş de sloganê sey ''Jin, jiyan, azadî", "Em ê bi berxwedanê bi ser bikevin" û "Êlih, ranezê xwedî li vîna xwe derkeve" ameyî vatene. Girseyo ke resa Xaçerêya Basinî govende zî grewte.

Hemsereka DEM Partî ya Êlihî Songule Korkmaz xîtabê girseyî kerd û ard ziwan ke şar do îradeyê xo teslîm nêkero û qayîrê îradeyê xo vejîyo.

Endama Platformê Cinîyan ê Adana Sevîle Araci zî vat ke qeyûmî hêverî hêrişê destkewteyanê cinîyan kenê coka ê hetê Gulîstane Sonuk de yê.

Hemşaredara Wanî Neslîhane Şedal îfade kerd ke cinî û ciwanan cewabê polîtîkaya qeyûmî ya îqtîdarî bi xoverdayîşî dayo.

Hemşaredarê Amedî Dogan Hatunî îfade kerd ke îqtîdar mecbur o ke îradeyê şarî bişinasno.

Hemşaredarê Wanî Abdullah Zeydanî pare kerd ke qeyûm xesp, talan û dizî yê û ê do şaredarîyanê xo apey bigêrê.

Hemşaredara Êlihî Gulîstane Sonuk vat: ''Ma bi şarê Êlihî sereberz ê. Înan vatêne qey bi qeyûman ê do biresê armancê xo. Ma do ferasetê camêrdan birijnê.''

DBP’ê Çîgdem Kiliçgun Uçar vat: ''Xoverdayîşê şarê Êlihî xoverdayîşê azadîya îradeyî yo. Şarî bi weçînayîşê Gulîstane mesajê 'Jin, Jiyan, Azadî' da îqtîdarî. Ne dewlete ne zî qeyûmî nêeşkenê raştîyan bivurnê. Ma do tim kuçeyan de bibê. Heta qeyûmî şorê ma tîya de yê.''

Polîsan eşkerayîye ra dima hêrişê girseyî kerd. Girseyî tîya de bi deyîranê kurdkî govende girewte. Dima polîsan bi gazê îsotî û awa tazyîkîne hêrişê şarî kerd. Rixmê hêriş zî girse vila nêbi.

Xoverdayîşê şarî dewam keno.