3ê tebaxa 2014î de êzidîyî raştê qirkerdişêkê pîlî ameyî. Dinya nê qirkerdişî rê vengê xo nêkerd. Hukmatê Iraqî zî heta nika seba komelê êzidîyan çîyêk nêkerd. Endamanê dezgeh û rêxistinanê êzidîyan derheqê babete de ANFyî rê qisey kerd.

Endama Têgêrayîşê Azadîya Cinîyan ê Êzidîyan (TAJÊ) Wetha Reşo îfade kerd ke ê hê kewenê serrgêra 8. ya fermanî û vat: ''Ferman de bi hezaran merdimê ma ameyî qetilkerdene û hema zî bi hezaran cinî û domanê ma destê DAÎŞî de yê. Ma nê fermanî ra dima asta xo ya rêxistinîye zêdînaye. Ma sey êzidîyan hêdî wayîrê hêz û îradeyî yê, dezgeh û sazgehê ma est ê. Wextê fermanî de ne hukmatê Iraqî ne zî hukmatê Başûrî wayîrê ma vejîyayî. Xêrê gerîlayan ra ma xelisîyayî. Ma keda înan qetî xo do xo vîr a nêkerê.''

Endamê Meclîsê Xoserî yê Demokratîkî yê Şingalî Xelef Osmanî vat: ''Êzidîyî temamîya tarîxî de tim raştê fermanan ameyî. Ganî êzidîyî hêdî pê çewî bawer mekerê. Ganî êzidîyî hînî yewîya xo awan bikerê, vera hêrişan têkoşînê hemparî bikerê. Wextê fermanî de ê kesanê ke hetkarîya ma nêkerde ê nika wazenê reyna ma qir bikerê.''

Endamê PADÊ Saleh Êzdînî vat: ''Ma hende fermanî dîyê, erdê Iraqî de ciwîyenê la hukmatê Iraqî ma sey netewe û dînî qebul nêkeno coka heqanê ma zî nêdano ma. Xora Iraq zî ver bi parçebîyayîşî şino. Başûr cara hetê dewleta tirke ra ameyo îşxalkerdene. Eke ma pabeyê hukmatî bibê ma do heqanê xo qetî nêvisnê xo destî. Ganî ma seba xo têkoşîn bikerê.''