Wexto ke dewleta tirke ya îşxalkere hêrişê xo rê dewam kerdêne Serekwezîrê Iraqî Mustafa El Kazimî şi zîyaretê Hewlêrî.

Serekwezîrê Herêma Kurdîstanî Mesrûr Barzanî şi ke Kazimî pêşwazî bikero. Goreyê eşkerayîyanê Herêma Federale ya Kurdîstanî Wezîrê Karanê Teberî, ê Pawitişî, Petrol, Koçberî û selahîyetdarê bînî heyetê Bexdadî de yê.

Kazimî do Serekê PDKyî Mesûd Barzanî û Serekwezîr Mesrûr Barzanîyî reyde kombîyayîş bikero. Dima zî do şoro Berê Sînorî yê Îbrahîm Xelîlî.

Yeno pawitene ke Serekwezîrê Iraqî do şoro kampêka êzidîyan û dewanê Amedîyê yê ke dewleta tirke înan ser o bombayî varnaybî.

Dima ke Serekê Herêma Federale ya Kurdîstanî Nêçîrvan Barzanî şibi Anqara no zîyaret ame kerdene.

Derheqê muhtewatê pêvînayîşan de zanayîşêk nêdîya. La wexto ke zîyaretê El Kazimîyî dewam kerdêne hêriş û îşxalê dewleta tirke zî dewam kerdêne.