Dêrsim de EMEP, HDP, ESP û Partîzan amebî têhet û Yewîya Hêzî ya Şorişgêre ya Dêrsimî nayebî ro û vizêr Pulur de buroyê weçînîyayîşî yê Yewîya Hêzî ya Şoreşgêre ame akerdene. Parlamenterê HDP’yî yê Dêrsimî Alîcan Onlû, parlamentere HDP’yî yê Antalya Kemal Bulbul, endamê EMEP’î Yusuf Karataş, Mustafa Taşkale, temsîlkarê Partîzan û ESP’yî û namzede hemserekîya Şaredarîya Dêrsimî Nurşat Yeşîle û Hidir Demîr beşdarê programê akerdişi bîyî.

GANÎ MA QERARÊ XO YÊ MUCADELEYÎ BIMUSNÊ

Namzeda hemserekîya Şaredarîya Pulurî Serpîl Argine programê akerdişi de wina qisey kerd: ”AKP, pêroyê îmkananê dewlete seba xo keno seferber. Şarê Pulurî bi kar û xebatî tehdit keno vano şima ke reya xo bidê mi, ez do şima bi raya ÎŞKUR’î bika kar. Ma do zîhnîyetê qeyûmî yo ke îradeya şarî û keda şarî gasp kerdo ra hesab bipersê.” Argine venga cinîyanê Pulurî da ke wa hem seba 8’ê Adare, hem zî seba weçînayîşî vengê xo bikerê berz û wina dewam kerd: ”Bi serran o ke cinîyî teberê siyaset û warê ûmûmîyî de girewtî. Ma domanî kerdî pîl. Keyeyî serûber kerdî.. Êdî bes o. Ewro ra dima ma do bibê parçeyê cuya komelkîye û îdareyî.”

ÇIYO TEWR MUHÎM YEWBÎYAYÎYE YA

Namzedê hemserekîya Şaredarîya Pulurî yo bîn Kemal Dînlergulerî zî qiseykerdişêk kerd û wina va: “Ma do wayîrê erjeyanê demokratîkan bivejîyê, bajarê xo bi meclîsanê şarî îdare bikê.

Dînlergulerî ra dima parlamenter Alîcan Onlûyî qisey kerd. Onlûyî  bale ante rewşa şarê herême ser û wina va:”Jan û derdê tewr pîlî şarê Pulurî dîyî. Şarê Pulurî zaf mucadele kerd, ma zî no rayîr de yê. Ma nê zulmî 39 ra nas kenê. O wext seba ke ma nêbî yew, rastê qetlîamî ameyî. Ma ewro baş zanê ke çiyo tewr muhîm yewbîyayîye ya.

EWRO DORGIREWTIŞÊKO FAŞIST Û NETEWPEREST ESTO

Endamê EMEP’î Mustafa Taşkesenî ard vîrî ke bi zulme OHAL’î, bi kriz û feqîrîye vera weçînayîşê 31’ê Adare şonê û wina dewam kerd: ”No weçînayîş tena weçînayîşê herêmîyî nîyo, vera polîtîkayanê AKP’yî platformê mucadeleyî yo. Seba AKP’yî vêşanî û feqîrîye tena teferûat o. Ma do cewabê înan bidê ci. Bînalî Yildirim seba cinîyan vano ‘îtaat bike rehet bike’. Cinîyê Pulurî yê xoverdayoxî do cewabê ey bidê ci.”

Parlamenterê HDP’yî yê Antalya Kemal Bulbulî zî wina qisey kerd: ”Ewro dormeyê ma hetê zîhnîyetê faşist û netewperestî ameyo girewtene. Nê erdî ser o zulimo ke nêameyo kerdene nêmend, la ma reyna zî tîya de yê.” Temsilkaranê Partîzan û ESP’yî zî şarê Pulurî silam kerd.