Meclîsê Cinîyan ê DEM Partî Têhetameyîşê Cinîyan ê Seba Înşayê Haştîye û Komelê Demokratîkî ke do bajaranê Kurdîstan û Tirkîya de bikerê, Îstanbul de da destpêkerdene.

Têhetameyîşo ke Otêleka Taksimî de ame kerdene Meclîsê Cinîyan ê DEM Partî, rêxistinanê cinîyan, femînîstan û platforman dir ame têhet. Têhetameyîşo ke bi sernameyê '2Demokrasîya herêmî de bi têkoşînê cinîyan sîyasetê haştîye'' ame kerdene xeylê kesî cinîyî ci bîyî.

Vervatoxa Meclîsê Cinîyan ê DEM Partî Halîde Tukoglu qiseykerdişê akerdişî kerd. Turkolgu nê vatî: ''Badê vengdayîşê Birêz Ocalanî yê 27ê sibate ma sey cinîyan ê DEM Partî zî tay munaqeşeyî kerdî. Nê munaqeşeyan de tewr zaf haştîye û komelo demokratîk vejîyayî vernî. Sîyaset bi xo bi ziwanê camêrdê serdestî qala haştîye û komelê demokratîkî nêkeno. Ma verî cinîyan ê partîyanê ke meclîs de yê, ameyî têhet. Eke na mesele meclîs de yena çareserkerdene bê cinîyan qetî çareser nêbena. Komelbîyayîşê haştîye têna bi sîyasetê merkezî nêbeno. War de, herême de rêxistinkerdiş hewce keno.

Îqtîdar proses goreyê xo rayra beno. Qala înşakerdişê komelêkê demokratîkî yena kerdene la hetê bînî ra qetilkerdişê vera cinîyan dewam kenê. Rojdemê cinîyan gerek merê nimitene. Meseleyê şîdetê cînsî, destbendkerdiş, tepiştiş… têkoşînê ma yê seyyewbînîye gerek ma bikerê rojdemê bingeyî yê komelê demokratîkî. Ma hewceyê pênîyazanê rêxistinanê cinîyan, femînîstan ê. Ma wazenê  hetêkî ra nê prosesî meclîs de bimanê hetê bînî ra herême de nê munaqaşeyî rayra berê. Ma wazenê bi pêardişê paştdayîşê cinîyan derheqê bawerî û nasnameyanê cîya cîyan de qisey bikerê.''