Newroza Amedî ewro qezaya Rezanî de Parka Newroze de yena fîrazkerdene. Newroza bi şîarê ‘Semedê azadîye Komelê Demokratîkî’ de coş dewam keno.

Şayîye de hêverî nameyê Îtîfaqê Kurdîstanî ser o Mehmet Kamaçî qisey kerd û vat ke ganî na Newroze de kurdî hinî yewîya xo bîyarê ca. Kamaçî bale ante Vengdayîşê Haştîye û Komelê Demokratîkî yê Rayber Apoyî ser û venga dewlete da ke wa game bierza.

Dima Wekîla Dem Partî Sumeyye Boz zî mesajê tepişteyan wend. Mesaj de tepişteyanê sîyasîyan da zanayene ke ê paştî danê vengdayîşê Rayber Apoyî û vat: ‘’Newroza Amedî beyanê îradeyî yê seba haştîye û çareserîye yo. Ma do heta peynî nê îradeyî bipawê. Seba ke no vengayîş cayê xo bivîno ganî şarê ma mesuldarîya xo bîyaro ca. Roje roja pîlkerdişê têkoşînî ya. Wa Newroza 2025î biba wesîleya azadîye û haştîye.’’