Karkero kurd Ozkan Tokayo ke vizêr qezaya Dînarî ya Afyonî hetê nîjadperastan ra bi çeke ame mirênayene, memleketê xo Erdîşê Wanî de ame definkerdene.

Cenazaya Tokayî ke rasteyê teyara ra ameye girewtene û ameye berdene taxa Çelebîbagî. Goristan hetê polîsan ra gerîya binê ablûqa û destûr nêdîya ke şar tewrê  merasîme cenaza bibo. Merasîmo ke Walîyê Wanî Mehmet Emîn Bîlmez zî tewrê ci bi de tewerbîyayîşê HDPyî ame astengkerdene. Parlamenterê HPDyî yê Wanî Murat Sarisaç û partîyîjê bînê ke heta verê goristanî ameyî  nêeşkeayî bikewê goristan. Naye ser o têmîyankewtişo kilm qewimîya.  Reyna destûr nêdîya muxabîranê Ajansê Mezopotamya û Jinnewsî.

Wekîl Sarisaço ke nêeşke bikewo goristan vist vîrî ke Tokay seba ke kurdbi ame mirênayene û vat: ''Cilmê heme kurdanê ke yenê kiştene milê hukmatê AKP-MHPyî de yo. Xora nê mergî ra ma pêro mesuldar ê. Birayê ma Ozkan Tokay şehîdê ma hemeyan o. Îqtîdar wazeno ke pê gonîya kurdan payra bimano. Vera naye gerek kurdî pîya têbigêrê. Yewbîyayîşê kurdan çar perçeyan zî  do bixeslino. O wext seba ke kurdkî qisey kerd merdimî nînê mirênayene.''