Endama Komîteya Merkezî ya PKKyî Hêlîne Umît Medya Haber TVyî de rojdem ercna.

Ernayîşanê Hêlîne Umît ra tay noqtayê girîngî wina yê:

''Tecrîd hema zî dewam keno. Ganî ma raştîya Îmraliyî hol fam bikerê ke raştîya xo zî fam bikerê. Vera tecrîdî têkoşîn zî dewam keno. Seba şarê kurdî Rayber Apo yeno manaya estbîyayîşî. O teyna lîderêko sîyasî û leşkerî nîyo. Rayberîye bi xo sîstemêk o. Xora Zîndanê Îmraliyî seba rijnayîşê nê sîstemî ronîyabi. Dewleta tirke xiret kena ke Îmrali de bi tecrîd û îşkenceyî netîce bigêra û îradeyê şarê kurdî bişikna.

Têkoşînê seba azadîya Rayber Apoyî ganî têkoşînêko rêxistinkerde û komunal bibo. Her ca de, zîndanan de, meydanan de têkoşîn yeno kerdene. Nika çarçewa safhaya diyîne ya Hemleya Azadîye de çalakîyî yenê kerdene. Embazanê ma yê zîndanan zî safhaya diyîne daye destpêkerdene. Ancî merdim û keyeyê tepişteyan zî çalakîyanê biqîmetan kenê. La ganî no têkoşîn bêro hîrakerdene. Eke her ca de waştişê azadîye û estbîyayîşî bêro vatene, bipawîyo, edebîyat û propagandaya ci bêrê kerdene û sîyasetê ci bêro awankerdene tecrîd do bêro wedaritene.

Herêmanê Pawitişî yê Medya de şer asta tewr girane de dewam keno. Dewleta tirke ya qirkere îşxalê Kurdîstanî kena. Nika rejîmê Tirkîya rejîmê şerî yo. Îqtîdarê AKP-MHPyî û dewleta tirke kenê ke şarê kurdî qir bikerê. Hîrê serrî yo Herêmanê Pawitişî yê Medya de şer est o. 16ê nîsane de şer kirişîya astêka berzêre. Gerîlayî hem mewzîyanê xo pawenê hem zî hêrişê dişmenî kenê.

Gerîlayî 1980 ra nata Başûrê Kurdîstanî de yê. Şarê Başûrî qetî gerîlayan mesele nêkeno, heta PKKyî rê hûrmet keno. Başûr de dewleta tirke îşxalker a, gerîlayî ney. Başûr de dewleta tirke Mûsil û Kerkûk de cerganê xo rêxistin kena. 

Îşxalê vera Rojawanî ancî rojdemê dewleta tirke de yo. Nika zî bahaneya înan weçînayîşê herêmîyî yê 11ê hezîrane yê. Hêzê mîyanneteweyîyî ganî xo vîr a nêkerê ke şarê Rojawanî vera DAÎŞî şerêko xurt kerdbi. Coka ganî ê zî şarê Rojawanî reyde vera dewleta tirke têbigêrê. Dewleta tirke Rojhelatê Mîyanênî de Îsraîlo diyîn o. Dewleta tirke dişmenê pêro kurdan a.

Esadî vato ke 'eke Tirkîya wazeno mi de pêvînayîş bikera ganî hêzanê xo yê îşxalkerdeyan herême ra veja.' Ma pê bawer ê ke Beşar Esad dersanê xo bigêro û tewirêkê rûmetênî biweçîno. Weçînayîşê herêmîyî yê Rojawanî 11ê hezîrane de yê. Çimê pêro dinya Rojawan de yê. Eke dewleta tirke hêrişê Rojawanî bikera îradeyo ke DAÎŞ bin visto cewabê aye zî do bido.

Ez serrgêra Hemleya 1ê Hezîrane fîraz kena. Hemleya 1ê Hezîrane tarîxê ma de wayîra cayêkê girîngî ya. Hemleya 1ê Hezîrane vera Komployê Mîyanneteweyîyî û xeta tasfîyekeran ameye kerdene. Eke Hemleya 1ê Hezîrane ra nêbîyêne ma ewro nêeşkayêne estbîyayîşê kurdan ser o qisey bikerê.

Tirkîya de sîyaset ney şer serdest o. Şer şikl dano sîyasetî. Ma eşnawit ke Şaredarîya Colemêrgî rê qeyûm ameyo tayînkerdene. Qeyûm darbe ya. 31ê adare de weçînayîşê herêmîyî ameyî kerdene. Şarî îradeyê xo eşkera kerd. Weçînayîşanê 31ê adare de reya verêne AKP bi partîya diyîne. Coka AKP gêreno ke CHPyî bikero hemkarê kerdişanê xo. Eke CHP wazeno ser bikewo ganî kerdişanê AKPyî rê nêbo hemkar.''