Qeymeqamê Çemçemalî pare kerd ke bi dronî warê Gazî yê Kormorî yê Çemçemalî hêriş ameyo kerdene. Hêriş de çar karkeranê ofîsê petrolî dinyaya xo bedilnaye û di kesî birîndar bîyî. 

Qeymeqamî vat: ''Wa hukmatê Iraqî çimeyanê welatî bipawo û tedbîran bigêro. Wa partîyê Başûrî zî bi yewîya xo verê hêrişanê winayênan bigêrê.''

Hetkarê Serekwezîrê Herêma Kurdîstanî Kubat Talabanîyî îfade kerd ke wa hukmatê Iraq û Herêma Kurdîstanî hêrişî ser o tehqîqatêkê hîrayî bikerê û tedbîranê xurtan bigêrê. 

Serekkomarê Iraqî Latîf Reşîdî hêrişî ser o vat: ''Hêrişê vera Kormorî asayîşê şarê ma û erdê ma vist binê tehlukeyî.''

Seba cigêrayîş û tehqîqatê hêrişî komîsyonêk ame awankerdene.