Qers û Meletî de, keyeyî û esnafî ameyî zîyaretkerdene, qezaya Amedî Rezan de zî buroyê weçînayîşî yê cinîyan ame akerdene.

Namzedê hemserekîya Şaredarîya Qersî yê HDP’yî Ayhan Bîlgen û Şevîn Alacaye, Teahûdnameya Şefafî ya Îdareyê Herêmîye ya Komelaya Şefafîye ya Mîyanneteweyîye îmza kerde. Komela vera bêusûlîye de mucadele kena û seba ke îdareyê şefaf û dirûstî bêrê ronayene û dewam bikerê paştdarîye dana xebatan.

Taxa Şêx Şamîl a qezaya Rezanî ya Amedî de buroyê wêçînayîşî yê cinîyan ame akerdene. Namzeda hemserekîye ya Bajarê Pîlî ya Wanî Hulya Alokmen Ûyanike, namzeda hemserekîye ya Şaredarîya Rezanî Zubeyde Zumrute, namzeda hemserekîye ya Sûrî Fîlîz Bûlûttekîne, namzeda Şaredarîya Yenîşehîrî Belgîn Dîkene, namzeda Şaredarîya Peyasî Kezban Yilmaze, parlamentera bajarî Salîha Aydenîze, Dayîkê Aştîye û xeylî kesî beşdarê programê akerdişî bîyî. Cinîyan bi dawul û zurna govende girewte û sloganê sey ‘Leyla Guvene rûmetê ma ya’, ‘Biciwîyo xoverdayîşê zindanan’ eştî.

Namzedê hemserekîya Şaredarîya Bajarê Pîlî yê Meletî Yûsûf Bozkûşî, çarçewaya xebatanê weçînayîşî de, esnafê bazarî zîyaret kerdî. Bozkûşî esnafan de derheqê krîzî de qisey kerd û derheqê projeyanê xo de vilawekî kerdî vila.

Qezaya Bedlîsî Tetwan de, parlamenterê HDP’yî yê Bedlîsî Celadet Gaydali, namzedê hemserekîya Şaredarîya Tetwanî Habîp Yeşîltepe û Serap Çakmak Gençe, bi seyan kesan esnafê Vadeyê Komarî zîyaret kerdî. Şarî eleqayêka pîle musnaye namzedanê HDP’yî û namzedan goşdarîya pêşnîyaz û problemanê şarî kerde. Namzedan esnafî dawetê akerdişê buroyê weçînîyayîşî yo ke meşte do bi beşdarîya Hemserekê HDP’yî Sezaî Temellîyî  bibo kerdî.

Peyê cû bi beşdarîya desan kesan, Cadeyê Komarî de buroyê weçînayîşî ame akerdene û parlamenter Gaydalîyî qiseykerdişêk kerd.