Cinîyê şerwanî yê ke Wareyê Pawitişî yê Medya de xover danê bi wesîleya 8’ê Adare Roja Cinîyan ê Kedkaran ê Dinya cinîyan ê ke zîndanan de yê înan rê yew mektûbe nûşt. Mektûb de ca dîya nînan:

“Xoverdayoxê sînayeyî yê zîndanan, çalakwanê erjayeyî, cinîyê xoverdayoxî;

Sere de ma şima bi ganîyîya menga Adare û bi heyecanê wisarî, bi vayê honikî yê koyan bi sînayîşî silam kenê, 8’ê Adar a şima pîroz kenê. Wisar newe ra ganebîyayîşê xoza yo. Senî wisar xoza keno gane şima zî bi xoverdayîşê xo yê grevê vêşanîye cuya ke yena waştene hetê faşîzmî ra bêro tarîkerdene newe ra kenê gane.

Tarîx ra heta ewro cinîyî cuye bi xo, mûnayoxê ci, hemverê tarîyîye de roşnayî bîyê. Xoverdayîşê aye yê hemverê zext û qirkerdişanê zihnîyetê camêrdî yê serdestî, mucadeleyî dayo dewamkerdene. Ewro şima polîtîkaya îqtîdaro faşîst ê AKP-MHP’yî yo ke wazeno cuya açarno tecrîdî qebûl nêkenê, bi nê hawayî cuye newe ra mûnenê. Xoverdayîş xusûsîyeto tewr bingeyên ê cinîyan o.

ŞIMA PEYREWÊ SEMA YUCE YÊ

Ma bi embazbîyayîşê keynayanê mayanê ke dejê pîlî antê, hemrayanê Sara û Semayanê ke seba azadîya welatê xo mucadele dayê, embazanê Leyla Guvene yê ke hemverê tarîyîye de ver bi rojî vazdayê serberz ê. Şima wextê xo de serkewtişî afernenê, mucadeleyê azadîye û seypêyîye danê; bê ke ma biewnîrê ca, welat yan zî parzemînî ra ma şima dir yewîya ruhkîye yê xoverdayîşî ciwîyenê.

Her game de, her awirî de, her nefesî de, ma benê yew û heman hedefî ser o vindenê. Ma bawer kenê û zanê ke no xoverdayîşê ma do bi ser bikewo û pêresayîşo ke ma hesreta ci ancenê do bica bêro. Ma do rayîran ra pîya şirê, hewayê pakî biancê, xeyalê zergûnayî û xasekîya erdê welatê xo pîya ciwîyayîşî bica bîyarê. Axir ma ê kes ê ke tim xeyalanê xo dima şinê. Xeyalê ke her game de benê pîl, zehmetîyê înan estê la çene şino benê xasek.   

Ewro, ma ê 129 cinîyan ê ke 1857 de xo bi vêşnayîşî feda kerdî hewna hîs kenê û bi xoverdayîşê înan 8’ê Adare pîroz kenê. Her yewa ma 129 cinîyan hîs kena, ciwîyena. Her yewa ma hemra û peyrewê Clara Zetkînan, Zîlanan, Sarayan, Berîtanan ê. Her yewa ma benê Kîbrîye, Menale, Hacere, Sabîha, Reyhane, Şadîye, Aytene, Evîne, Azîme, Ronahî û Esma. Her yewa ma bi xoverdayîşê azadîye wela xo ra cuye afernena. Seke hemraye Sema Yuce wela xo ra xo afernaye. A koletî, peydemendîye, tarîyîye bi adirê xo roşin kerd, vêşna û çinê kerd. Verê xo da Rayberîye, Rojî û ver bi azadîye vazdaye. Şima hemrayê Sema Yuceyan ê, peyrewê aye yê.    

RAYRAŞÎYAYÎŞANÊ MA TIM TARÎX NÛŞTO

Rayîrê ma heman ê û ma heman rayîrî ser o rayra şinê. Pîyarêyê ma ge-ge bivurîyê zî tîtiko ke ma wazenê biresê ci heman o. Nika şima pîyarêya tewr zehmete weçînaye û bêrincanbîyayîşî rayra şinê. Rayraşîyayîşan tim ma sefênayê, tim bihêz kerdê. Ge-ge tamê şîîre de ge zî tamê romanî de bê zî rayraşîyayîşanê ma tim tarîx nûşto.

Cinîyê xoverdayoxî yê ke tarîx nûsenê;

Cinîyê ke hemverê faşîzmî de serkewtiş bi dest fînenê, yê ke serdestîya camêrdî qebûl nêkenê bi azan ciwîyenê û rêça înan her cinî de xo sey îlham û hêzî verdana. Cinîyê ke xover danê heme cinîyan ê ke kuçe de, fabrîka de, hêga de, zîndan de û ko de yê pîyarêya azadî û seypêyîye de pêresenê, heme okyanûsan rê benê çirr û herikênê.

Cinîyê ke bi xoverdayîşî benê azad û bi azadbîyayîşî benê xasek, cinîyê ke cuye ra qaso ke seba ci bimirê hes kenê, ma nika nê dewrî de yê ke pêro pîya faşîzmî bin fînenê, bi xoverdayîşê xo mujdana rojanê roşinan danê. Eke xoverdayîşê hemverê koletî, zextî û qirkerdişî yê şarêk rê cinîyî serkêşîye kenê serkewtiş qetî yo.       

GANÎ FAŞÎZM CINÎYAN Ê KE PÊGIREWTEYÊ SERKEWTIŞ Û AZADÎYE YÊ RA BITERSO

Faşîzmo ke cinîyan ê mîyanê xoverdayîşî de yê ra terseno, bi zext û qirkerdişan, bi rewadîyayîşê her tewir koletî, wazeno ke cimatî de modelê cinîya koleye bica bîyaro, înan bitepişo, mîyanê vêşanîye de û bêkarîye de verdo û bi nê hawayî sîstemê xo yê faşîzanî rono. Labelê zano ke do nêeşko bi ser bikewo. Zîndanan de bi seyan cinîyî yê ke nê rê benê asteng, bedenê xo dayê vêşanîye ver û xover danê, rixmê cop û sîlehanê polîs û leşkeran cinîyê ke rayra şinê xover danê, koyan de xover danê û heme cinîyan xo tena serkewtişî rê hadre kerdo.

Ganî faşîzm ê cinîyan ê ke xo serkewtiş û azadîye rê girê dayo ra biterso. Zihnîyetê camêrdî yo serdest ganî biterso. Înan ê ke koletîye qebûl kerdê ganî bitersê. Çunke ma ê cinî yê ke bedenê xo danê verê vêşanîye, kenê bomba, benê guda adirî, teraşan ra xo erzenê û seba azadîya xo xover danê.

Cinîyê xoverdayoxî yê ke bê azadîye û serkewtişî tu çîyê bînî qebûl nêkenê, ma şima bi pêgirewtişê xo yê bi azadîye û bi bawerîya xo ya bi serkewtişî silam kenê, 8’ê Adar a şima pîroz kenê, bawer kenê ke ma do qetî bi ser bikewê.

Xoverdayoxê koyan.”