Bajarê Hewlerî yê Başûrê Kurdîstanî  de seba ke tecrîdê serê Rayberê Şarê Kurdî Abdullah Ocalanî bêro wedaritene grevê vêşanîye amebi destpêkerdene û grev hîna zî seba ke talebi nêameyê ca dewam keno.

Xoverdayîşê grevê vêşanîye bi hewayê biwext-bidore ameyo destpêkerdene û çalakwanan ra mamosta, şaîr Îdrîs Siddik, muhendîsê zîreetî yo teqawitbîyaye Kawa Qadir Nadir û Akademîsyenê Unîversîteya Selahattînî Qasim Abdullah Omerî ewro çalakîye dewr girewte.

Nasir Yagiz ê HDP’yîyî Leyla Guvene ra 13 rojî dima dest bi grevê vêşanîye kerdibi û her çiqas ke hetê weşîye ra rewşa ci bibo giran zî çalakîya xo domneno. Nasir Yagiz çalakîya xo bêwext û bêdore domneno, la seba ke paştdarîye bidê, reyna Hewlêr de çalakîya grevê vêşanîye ya biwext-bidore ameya destpêkerdene.

Nuştox Kawa Qadir Nadirî derheqê beşdarbîyayîşê ci yê çalakîye de wina qisey kerd: “Ez pêroyê çalakîyê ke her hetê dinyaye de, seba Rayberê Şarê Kurdî Abdullah Ocalanî ameyê destpêkerdene sey ê xo vînena. Ez bawer kena ke çalakîya Leyla Guvene ya ke kewta roja 119’î û çalakîya Nasir Yagizî ya ke kewta roja 106’î do netîce bigîrê. Bi nê xoverdayîşan yew destane ameye nuştene. Ocalan rayberê ma yo. Bi komploya miyanneteweyîye girewt binê esaretî. 20 serrî yo ke zindan de, binê tecrîdê giranî de yeno girewtene. Ganî Rayberê ma bibo azad. Ocalan seba azadîya Kurdan mücadele keno û naye ra binê tecrîdî de yo. Ma yew grûba roşnvîr, nuştox û aktîvîstanê sîyasîyan ê Hewlêrî zî na çalakîye û no mücadele de cayê xo girewt. Na çalakîye seba paştdarîye nîya. Ma nê mucadeleyî sey mücadeleye xo vînenê, coka tîya de yê. Ganî ma Kurdî bibê yew.”

NO TECRÎD MA PÊRO KURDAN RÊ YENO KERDENE

Akademîsyenê Unîversîteya Selahattînî Kasim Abdullah Omer zî wina vano: ”Ma zî waşt ke nê xoverdayîşî de cayê xo bigîrê. Pêroyê dinyaye zî zana ke ma yew şar ê û yew Rayberê ma binê esaretî de yeno girewtene. Tecrîd tena Rayber Apoyî ser nê, pêro Kurdan ser esto. Ez bawer kena ke çar parçeyê Kurdîstanî de pêroyê şarê Kurdî do biwirzo payan ser û çalakwanan û Rayberê xo rê wayîr bivejîyo. Çunke xoverdayîş her ke şono beno hîra.”

FELSEFE Û FIKRÊ OCALANÎ ÇAR PARÇE KURDISTAN DE YÊ

Mamosta-Şaîr Îdrîs Siddikî zî wina qisey kerd: “Başur, Rojakewte, Rojavan û Vakur de grevê vêşanîye dewam kenê û nê çalakîyî seba ke tecrîdê serê Ocalanî bêro wedarnayene ameyê destpêkerdene. Rayber Apo bi xo zindan de yo, la felsefeya ci çar parçeyanê Kurdîstanî de, hetê şarî ra ameya qebûlkerdene. Rayber Apo nêwazeno ke şaro Kurd bibo lete. Nêwazeno ke dewletê bînî Kurdan înkar bikerê û çinbikerê. Ereb, Faris û Tirkî dişmenê Kurdan ê û wazenê ke Kurd û Kurdîstanî çinbikerê. Nê dewletan de tayê hetî qaşo wazenê ke problem çareser bibo. La Kurdî ganî xoverdayîş û mücadeleyê xo ra peyser game nêerzê. Ma zî qasê xo kenê ke xo ver bidê û coka ma zî kewtî na çalakîye. Xêrca serkewtişî rayîrêko bîn çin o seba ma. ”