26ê teşrîna verêne de Hemsereka DEM Partî ya qezaya Sûrî Melîha Comert rê, 14ê teşrîna peyêne de zî wendekaranê Zanîngehê Dîcle û 12ê kanûne de vera wendekaranê Zanîngehê Munzurî hetê polîsan ra ajanîye amebî ferzkerdene. Tewr peyên Sekreterê Amedî yê KESKî Erhan Gumuşî rê ajanîye ameye ferzkerdene û seba ke ey no qebul nêkerd, ame tehîdtkerdene.

Serekê Şubeyê Amedî yê Komeleya Heqanê Merdiman (ÎHD) Ercan Yilmazî derheqê babete de ANFyî rê qisey kerd.

Yilmazî bale ante ser ke bi taybetî 2015 prosesê çareserîye ra dima tedayê vera komelî, kerdişê antîdemokratîkî zêdîyayê û vat: ''Teyna 2018 de 81 hemwelatîyan bi gerreyê ferzkerdişê ajanîye muracatê ma kerd. Bi taybetî bi hawayêkê sîstematîkî vera ê kesanê ke Kurdîstan de têkoşînê heqan kenê teda û ajanîye yenê ferzkerdene. Merdimî eke ajanîye qebul nêkerê hetê polîsan û endamanê îstîxbaratî ra raştê tehdîtan yenê. Ancî nê merdimî raştê îşkenceyê psîkolojîkî zî yenê; her roje înan rê telefon yeno akerdene, yenê teqîbkerdene. Serranê peyênan de na babete ser o ma rê muracatê cidîyî ameyî. Ma zî nînan ser o muracatê Wezîrîya Karanê Zereyî kenê la wezîrîye qetî cewab nêdana ma.''

Yilmazî venga pêro hemwelatîyan da ke vera kerdişanê winayênan wa muracatê ÎHDyî bikerê. Yilmazî vat: ''Ma eşkenê bi têkoşînê xo vera kerdişanê sey ferzkerdişê ajanîye bigêrê. Ma  na babete de muracatanê hemwelatîyan zî sey gamêka girînge vînenê. Bi taybetî Kurdîstan de kerdişê xirabî û îlegalî yê vera merdiman zaf ê. Ma venga Wezîrîya Karanê Zereyî danê ke na mesele çareser bikera. Heta ke nê îdîayî û muracatê ke ma rê yenê kerdene nêrê cigêrayene pêro selahîyetdarê dewlete do binê tometî de bimanê. Ganî nê muracatanê şarî ser o cigêrayîşê bitesîrî bêrê kerdene. Eke nê kerdişî hetê karmendanê dewlete ra yenê kerdene ganî nê kesî karî ra bêrê girewtene û ceza bigêrê.''