Tepişteya sîyasî ya kurde Zeynebe Celalîyana ke menga hezîrane ra nata beşê karantîna yê zîndanê Weramînî de ya, hucreyê yewkesî yê zîndanê Kirmanî de yena tepiştene.

Goreyê xebera Torra Heqanê Merdiman a Kurdîstanî Zeynebe Celalîyan nê rojanê peyênan de bi rayîrê telefonî keyeyê xo de qisey kerd û îfade kerd ke rewşa ci giran a û Kirman de hucreyê yewkesî de tepişîyena.

Goreyê xebere Zeynebe Celalîyan eşkera kerd ke selahîyetdaranê zîndanî tira vat ke eke heqê sewqê ci bêro dayene, a do bêra erşawitene şaristanê Xoyî Zîndanê Urmîye. La sewqê ci nêame kerdene.

Zeynebe Celalîyan hewte de rayêke binê çimdarîya wezîfedaran de eşkena bi telefonî keyeyê xo de qisey bikera. Destûr nêno dayene ke Zeynebe bi kurdkî qisey bikera.