Zûra Walî û qeyûmî 'Aramî ameye Colemêrgî bi lezî peynîya ci ameye. Festîvala Walîtîya Colemêrgî ya Golanê Cîlo-Satî de qeyûm û walîyî îdîa kerdbî ke herême seba şar û xozaperestan akerde ya.

La festîvale ra dima herêmê Cîlo-Satî wayîranê destûrê taybetî ra ber ameyî qedexekerdene. Merdimê ke heywananê xo benê wareyan ancax pê destûrî eşkenê bikewê herême.

Sere de merkezê şaristanî de Çelê de bi temamî rewşa îstîsnayîye yena caardene. Çelê de merdimî ancax pê destûrî eşkenê bikewê herême. Hemwelatîyê ke teberî ra yenê Çelê hetê îstîxbarat, leşker, polîs û qoricîyan yenê teqîbkerdene û kesê ke Çelê de nasê înan çin ê yenê destbendkerdene.