Têgêrayîşê Azadîye yê kurdan keweno serra 45. ya têkoşînî. Welatperwerê rojawanijî Ebdilkerîm Koseyî bi wesîleya serrgêra ronîyayîşê PKKyî ANFyî rê qisey kerd.

Ebdulkerîm Koseyo ke Hesekê ra yo, 1987 de PKK şinasnayo. Koseyî vat: ''Ma partîye şinasnaye û pabesteyê ci bîyî. Têgêrayîş û halanê embazan zaf tesîrê ma kerdêne. Şarê Rojawanî bi girseyan tewrê partîye bi. Mi 27ê teşrîna peyêne ya 1994î de Lubnan de Rayber Apo dî. O çax bi wesîleya serrgêra ronîyayîşê PKKyî ma şîyî hetê ey. Rayber Apoyî pêvînayîş de verî ke ma pers bikerê yew bi yewe qala raştîya komelî, meseleyanê Rojawanî kerde. Rayber Apoyî ppêro meseleyî û çareserîyê înan ardî ziwan.''

Ebdulkerîm Koseyî îfade kerd ke dima ke ey Ocalan şinasnayo fam kerd ke o şarê kurdî yo û vat: ''Ey hema serranê 90an de vatêne ke ma hewceyê way û biratîya şaran ê. Dima ke ma o dî hîna zaf tewrê xebatan bîyî. Ma karê xo yê rêxistinîye hîra kerdî. Ma hînî rejîmî ra nêtersayêne. Rayberîye qerardarîya ma ya têkoşînî zêdînaye. Rayber Ocalanî xîtabê merdimatîye kerd. O heqîqatî temsîl keno. Pêro şarê kurdî, erebî û xirîstîyanî fikrê ey wendêne, kasetê ey goşdarî kerdêne û vilawekî wendêne. Eke ewro Rojawan de projeyê Neteweya Demokratîke ameya caardene tede tesîrê xebatanê ê çaxî zaf o.''

Koseyî bale ante ser ke fikrê Rayberê Şarê Kurdî Abdullah Ocalanî ewro resenê hîna zaf merdiman û vat: ''Ereb, sûryanî, armenî, asûrî zî wazenê fikrê Rayber Apoyî bêrê caardene û Rayber Apo azad bibo. Rayber Apoyî merdimatîye rê paradîgmaya xo sey mîrasî verdaye.''