Nê serê sibayî cerganê dewleta tirke vera hêrişê Îdlîbî kerd. Ajansê SANA yê rejîmê Sûrîye pare kerd ke hêrişê bi wesayîtê bombabarkerdeyî ame kerdene. Selahîyetdaranê Rûsya zî pare kerd ke hêriş de 40 leşkerê Sûrîye ameyî kiştene û 80 kesî birîndar bîyî.
Vizêrî ra nata teyarayanê Rûsya û teyarayanê şerî yê artêşa rejîmê Sûrîye bi hawayêkê giranî çeperanê cerganê Îdlîbî û Halebî ser o bombayî varnayî.
Rêxistina Teqîbkerdişê Heqanê Merdiman a Sûrîye ya ke merkezê ci London de ya da zanayene ke 24 saetanê peyênan de nêzdîyê 400 hêrişê teyarayan û helîkopteran ameyî kerdene.
Komanê cergan ê ke pabesteyê dewleta tirke yê hêrişanê teyarayan ra rewşêka tengasî de yê nê serê sibayî eşt merkezanê artêşa Sûrîye ser.
Merkezê Pêkerdişê Rûsya yo ke baregehê leşkerî yê Humeymîm de maneno derheqê netîceyê hêrişî de eşkerayîyêke daye.
Goreyê zanayîşan 40 leşkerê rejîmê Sûrîye ameyî kiştene û 80 kesî zî birîndar bîyî.
Ajansê Fermî yê Sûrîye SANA zî hêrişê komanê cergan Îdlîb de tesdîq kerd û nê zanayîşî dayî:
"Terorîstanê koma bi nameyê Cebhet El Nûsra serê sibayî bi çekanê giranan û wesayîtanê bombaberkerdeyan hêriş kerd."
Ajansî derheqê hûmara kişte û birîndaran ê artêşa Sûrîye de zanayîşêk nêda.
