Bajarê Wuppertalî yê Almanya de çarçewaya “Vengdayîşê Haştîye û Komelê Demokraîtkî” yê Rayber Apoyî de têhetameyîşê şarî ame organîzekerdene. Sîyasetmedar Dr. Îdrîs Baluken sey qiseykerdoxî tewrê kombîyayîşî bi.

Îdrîs Balukenî ard ziwan ke şarê kurdî polîtîkayê înkarî betal kerdî û no her hetî ra ame vînayene û vat, “Şarê kurdî warê tarîxî de pelo newe akerd.” Balukenî bale ante vengdayîşê Rayber Apoyî yê 27ê sibate ser û nê vatî: “No vengdayîş têna semedê partîyêk nêbi, semedê kurdan proseso stratejik da destpêkerdene. Perspektîfê çareserîye yê Ocalanî yê 30 serran ewro resayî merhaleya muxatabîye. No netîceyê têkoşînê seserran ê şarê kurdî yo. Nika semedê haştîye firsetêko gir est o la têna bi hetê kurdan nêbeno, gerek muxatap zî vera nê îradeyê cewabo ke hewce keno bidê. Têkoşînê kurdan hinî stratejîya sîyasî, komelkî û demokratîk a ke ameyoxî înşa kena.”