Înîsîyatîfê Yewîya Demokratîke yo ke Amed de rojêke verê cû ronîyayîşê xo îlan kerdibi, deklarasyonê xo eşkera kerd. Wekîlê DEM Partî Gulcane Kaçmaz Sayyîgît û Mehmet Kamaç sey vervatoxanê înîsîyatîfî ameyî weçînayene.

Deklarasyon Merkezê Kongre yê Amedî de bi kombîyayîşê çapemenîye ame eşkerakerdene. 

Hemserekê DBPyî Çîgdeme Kiliçgun Uçar û Keskîn Bayindir, Hemsereka DEM Partî Tulaye Hatîmogullari, Hemserekê KCDyî Berdan Ozturk û xeylê kesî tewrê eşkerayîye bîyî.

Eşkerayîye de Konferansê Tewirî yê Yewîye yê Rojawanê Kurdîstanî ame selamkerdene, qirkerdişê ke Sûrîye de qewimîyenê ameyî şermezarkerdene û bale ameye antene Vengdayîşê Haştîye û Komelê Demokratîkî yê Rayber Apoyî ser. Eşkerayîye de ame parekerdene ke înîsîyatîf paştî dano nê vengdayîşê Rayber Apoyî.

Eşkerayîye de armancê înîsîyatîfî wina ameyî rêzkerdene:

‘’-Înîsîyatê Yewîya Demokratîke do pêro beşanê bindestan bipawo, vera neheqîye, asîmîlasyon, teda û kerdişanê antî-demokratîkan tewir bimojno û seba awankerdişê cuya azade û demokratîke têkoşîn bikero.

-Înîsîyatîf do vera astengîya serê averberdişê kultur û bawerîyan têkoşîn bikero, sere de heqê perwerdeyê bi ziwanê dayîke seba azadîya pêro ziwan û kulturan têbigêro.

-Înîsîyatîf do vera kolonyalîzmî vejîyo, seba ke kedkar û beşê komelî biresê standartanê cuye bixebito.

-Vera texrîbatê xoza û rijîyayîşê ekolojîkî têkoşîn bikero, xoza û ekolojî bipawo.

-Înîsîyatîf fo polîtîkayanê yozkerdişî yê vera cinî û ciwanan sey gefî bivîno, vera nînan têkoşînê kolektîfî bikero.

-Înîsîyatîf do têdûştîya cinî û camêrdan sey krîterê esasî qebul bikero, têkoşînê vera şîdetî û cîyakerîye sey mesuldarîya xo bivîno.
 

-Înîsîyatîf do meseleyanê kesanê astengdaran sey meseleyanê komelî qebul bikero û seba çareserîya nînan bixebito.

-Înîsîyatîf do meseleya kurdan sey meseleya statu, demokrasî û azadîye biercno û vajo ke çareserîya na mesele bi sereraştkerdişê qanûnan û demokrasîyî mumkîn o.

-Înîsîyatîf do armanc bikero ke kapasîteya têgêrayîşî ya şarê kurdî bihêz bikero.

-Înîsîyatîf do pawitişê heqanê kolektîf û şexsîyan esas bikero, seba ke têkoşînê azadîye û têdûştîye yew zemîn bivîno bixebito.’’

Peynîya eşkerayîye de venga pêro partîyanê Kurdîstanî, beşanê komelî, rîsipîyanê şarî û komelanê bawerî û kulturan dîya ke wa paştî bidê înîsîyatîfî.