Endamê Komîteya Merkezî ya Partîya Demokratîke ya Kurdanê Sûrîye (PDKS) Gêlo Îsayî derheqê hêrişanê îşxalî û polîtîkayanê dewleta tirke de ANFyî rê qisey kerd.

Gêlo Îsayî destpêkê krîzê Sûrîye û Şorişê Rojawanî ra nata dewleta tirke hêrişê destkewteyanê şarê Rojawanî kena û vat: ''Dewleta tirke vera Rojawanî hetêkî ra provakasyon, reşkerdişî kenai erdê ma îşxal kena û şarê ma qetil kena. Dewleta tirke seba ke îşxalêkê neweyî ra zemîn nêdî narey zî hêrişê fermandaranê QSDyî kerd. Nê fermandaran vera DAÎŞî şerêko bêeman kerdbi. Seba ke kurdan pê têkoşînê vera DAÎŞî bala dinya ante xo ser dewleta tirke wazena kurdan çin bikera. Dewleta tirke coka cergan weye kena û herêmanê îşxalkerdeyan de cadana înan. Dewleta tirke wazena prosesê çareserîya krîzê Sûrîye de kurdî mebê wayîrê hêzî coka herême de kaos kena, merdiman dana koçkerdene û kena ke Îdareyê Xoserî tasfîye bikera.

Dewleta tirke dişmena ebedî ya kurdan a. Na dewlete PKK ra verî zî dişmena kurda bîye. Koalîsyono Mîyanneteweyî vera hêrişanê serê dewleta tirke vengê xo nêkeno yanî bi nê hawayî paştî dano nê hêrişan. Şehîdgehê ma pê ewladanê ma yê ke vera DAÎŞî şer kerd û feda kerd, pirr ê. Ganî komelê Ewropa verê nê ewladan de mesuldarîya xo bîyaro ca. Ganî no şarê Rojawanî komelê mîyanneteweyî de statuyo ke heqê ci yo bivisno destî.''

Gêlo Îsayî vist vîrî ke dewleta tirke hema zî paştî dano cerganê DAÎŞî û El Nûsra û vat: ''Dewleta tirke El Nûsra Efrîn de cakerd. Dewleta tirke bi nê hawayî wazena wa cergî û kurdî bikewê pê. Xora çarçewa kombîyayîşê Astana de no qewimîya. Îqtîdarê Tirkîya bi nê hawayî wazena weçînayîşan de ser bikewo. Înan verî demografîya Efrînî vurnaye, ekonomîya ci çin kerde û xozaya ci teqrîb kerde. Pê cerganê El Nûsra zî ê do kulturê Efrînî çin bikerê.''

Gêlo Îsayî pare kerd ke erebî zî ganî vera hêrişanê dewleta tirke yê serê Iraq û Sûrîye bêveng nêmanê û vat: ''Her kes vera hêrişanê kîmyewîyan ê dewleta tirke bêveng o. Yewîya Ereban zî wina ya. Bi taybetî PDK hetê dewleta tirke de cagêno ke no sûcêko pîl o.''