Şarê Efrînî yo ke rîyê hêrişê îşxalî yê dewleta tirke yê 20ê çeleyê 2018î de  mecbur mend ke bar bikero, bi wesîleya serrgêra hêrişan Şehba de çalakîye viraşte.

Rayraşîyayîşo ke dewa Babinisî ya Şehba de ame viraştene bi  des hezaran kesî tewrê ci bîyî û posterê kesanê ke Xoverdayîşê Dewrî û Xoverdayîşê Anorî yê vera îşxalê tirke de şehîd bîyî kiriştî. Reyna bi pankartan mesajê girdkerdişê xoverdayîşî ameyî dayene. Rayraşîyayîşo ke beyraqê YPG û YPJyî ameyî kiriştene pîya bi şarî temsîlkarê xeylêk dezgehanî zî tewrê ci bîyî. Badê rayraşîyayîşî qezaya Fafînî de mitingêk ame viraştene. Qiseykerdişan de ame vatene ke Efrîn bajerêko biasayîş û biîstîkrar bi la nika sekê dewleta tirke îşxal kerd têmîyankewitş, dizdîye qetilkerdiş û talanî  estê. Zihnîyetê dewlete nêwazeno ke şarî pîya bihuzur biciwîyê. Şarê Efrînî vera nê plan û komployan xo ver da ke anor û şerefê xo bipawo û xoverdayîşêko bimbarek ramojna. Qiseykerdişan bale ameye antene sere ke Efrîn de hema zî sûcî merdimîye yenê kerdene û ame vatene ke bêvengîya mîyanneteweyî nîna qebulkerdene. Temsîlkaranê dezgehan vist vîrî ke xoverdayîş dewam keno û vat Efrîn do bi fedakarîya şehîdan azad bo.