Hemserekê Merkezê Girê Sipî yê Partîya Yewîya Demokratîke (PYD) Sebrî Neboyî derheqê hêrişanê îşxalî yê dewleta tirke de ANFyî rê qisey kerd.

Sebrî Neboyî dîyar kerd ke dewleta tirke peynî de seba hêrişanê îşxalî destûrê hêzanê mîyanneteweyîyan girewto û vat: ''Dewleta tirke pê hêrişanê xo wazena herême veng bikera. Dewleta tirke pê destê DAÎŞî waştbi ke ney bikera la nêeşkaye. Nika zî qesasê DAÎŞî gêna. Dewleta tirke wazena  dima ke herême veng bikera, demografîya herême bivurna û herême bi temamî îşxal bikera. Hêrişê dewleta tirke nêzdîyê baregehanê Amerîka de qewimîyenê. Pêvînayîşanê Hakan Fîdan û Elî Memlûkî de no plan ameyo amadekerdene. Rejîmê Şamî zî wazeno herême veng biba.

Dewleta tirke têna vera Rojawanî nê vera Zap, Metîna û Avaşînî zî bi çekanê kîmyewîyan hêriş kena la çew vera Tirkîya tewir nêmojneno. Çunke dewletê mîyanneteweyî zî hemkarê nê hêrişan ê. Xora dewleta tirke bê destûrê înan hem zî pê çekanê NATOyî nêeşkayêne nê hêrişan bikera. Wa şarê ma nê dewletan ra çîyêk mepawo. Estbîyayîşê ma pawitişê ma yo. Ganî ma her cade bingeyê Şerê Şarî yê Şorişgêrî de xoverdayîşê xo pîl bikerê. Tek rayîrê ma xopawitiş o.''

Hemserekê Merkezê Girê Sipî yê Partîya Yewîya Demokratîke (PYD) Sebrî Neboyî venga hêzanê azadîgîran, terefgîranê haştîye û çareserîye da ke vera hêrişan tewirê xo bimojnê û vat: ''Ganî şarê ma xo nê şerî rê amade bikero. Şarê ma senî ke DAÎŞ pê Şerê Şarî yê Şorişgêrî bin vistbi bi nê hawayî eşkeno vera dewleta tirke zî ser bikewo. Ma şerî nêwazenê la ele dewleta tirke hêrişê ma kena ma do xo bipawê. Şarê ma wa tim meydanan de bibo û heqê xo yê pawitişî bişuxilno.''