Temsîlkaranê şaranê Minbicî derheqê hêrişanê peyênan ê dewleta tirke de ANFyî rê qisey kerd.

Endamê Meclîsê Qanûnsazî yê Minbicî Adil Ebû Ferhatî ard ziwan ke dewleta tirke pê destûrê Rûsya û Amerîka hêrişê Rojawanî kena û vat: ''Dewleta tirke DAÎŞî pawena û perwerde kena.  Dewleta tirke wazena aramî û îstîkrarê Îdareyê Xoserî birijna. Ma qetî nê hêrişan qebul nêkenê. Ma tim hetê şerwananê QSDyî de yê. Bi yewîya şarê xo û şerwananê ma yê QSDyî ma do pêro hêrişan pûç bikerê.''

Endamê Komîteya Çerkezan Semîh Hesen Hebaqî vat: ''Heta nika Rojawanî ra vera dewleta tirke hêrişêk zî nêame kerdene. Eqsê ci dewleta tirke tim teror kena. Ma vînenê ke rewşa ê herêmanê ke dewleta tirke îşxal kerdê senîn a. Coka ma vera hêrişan bi yewîtî têgêrenê. Sey şaranê herême ma do nê hêrişan pûç bikerê û îdareyê xo zî xurtêr bikerê.'' 

Endamê Komîteya Tirkmenan Salih Cuma Çagirgayî îfade kerd ke ê hêrişan û îşxalê dewleta tirke qebul nêkenê û vat: ''Dewleta tirke QSDyî sey terorîstî îlan kena la bi xo terorîzm kena. QSD seba pêro Sûrîye têgêreno.  Hewceyê ma bi dewleta tirke yan zî bi dewletêka bîne çin a. Ma rayîr nêdanê ke qet yew hêz yewî û sîstemê ma yê demokratîkî xera bikero.''

Eşîra Helîsatî ra Mistefa Îbrahîm Şihadeyî vat: ''Hêrişanê dewleta tirke ra domanê ma nêeşkenê şorê nêweşxane. Dewleta tirke pêro herêma ma kena hedef. Dewleta tirke sînorê xo derbaz kerdî û erdê ma de çalakîyanê terorî kena. Heta peynî ma vera nê hêrişan hetê QSDyî de yê. '' 

Eşîra Ebû Şabanî ra Xelîl Îhsan Xelîlî vat: ''Dewletê ereb, Amerîka û Koalîsyonê Mîyanneteweyî îradeyê şaranê Sûrîye rê hûrmet nêkenê. Ma sey şaranê Rojawanî vera nê hêrişan reyna yewîya xo mojnaye. Ma şerî nêwazenê la ma do heta peynî erdê xo bipawê.''