Hemwelatîyanê Serêkanîyê îfade kerd ke keyeyê înan ameyî vêşnayene û talankerdene û bi hetkarîya şarê Qamişloyî û dezgehanê şaristanî hewcedarîyanê xo peyda kenê. Serêkanîyêyîjan venga dezgehanê mîyanneteweyî da ke berpirsîyarîyanê xo bîyarê ca.
Îşxalê dewleta tirke û cerganê aye yê vera Rojawanî ra dima 300 hezar ra zêdêr merdimî nêçare mendî ke waranê xo caverdê û koç bikê. Nêzdîyê 960 keyeyan zî koçê Qamişloyî kerd. Şarê Qamişloyî xîret keno ke hewcedarîyanê koçberanê Serêkanîyê peyda biko.
Hemwelatîya serêkanîyêyîje Zîlane Mihemed Eşref vat: "Dima ke dewleta tirke Serêkanîyê îşxal kerd ma koçê Qamişloyî kerd. Rêxistina Hetkarîye ya Rovaja hewcedarîyanê ma peyda kena. Dewleta tirke û cerganê aye wexto ke Serêkanîyê îşxal kerd keyeyê ma talan kerdî û dima ê vêşnayî." Zîlanê venga dezgehanê mîyanneteweyî da ke hetkarîya koçberan bikê.
Endamê Îdareyê Komîteya Karanê Komelkî û Xebata Meclîsî yê Qamişloyî Fasîh Ehmedî vat: "Ma bi rayîrê komunan hetkarê koçberê Serêkanîyê kenê. Seba ke hewcedarîyê koçberan bêrê peydakerdene ma cade vengdayîşê hetkarîye kerd. Pêro hetkarîye hetê şarê ma ra ameye kerdene." Ehmedî venga dezgeh û sazgehanê mîyanneteweyî yê ke îşxalê dewleta tirke yê vera Rojawanî ra dima herême caverdaye da ke abigêrê û berpirsîyarîyanê xo yê vera şarî û koçberan bîyarê ca.
Endamê Komîteya Qamişloyî Xaşîî Sînoyî vat: "Koçberê ke nêeşkenê mazot bigêrê muracatê komunanê herême kenê. Ma kenê ke hewcedarîyanê koçberan peyda bikê."
