Şaredarîya Kantonê Efrîn-Şehba  rixmê îşxal, talan û heme problemanê bînan şarê xo rê xizmet kena. Hemşaredara Kantonê Efrîn-Şehba Elîfe Mihemed derheqê sîstemê şaredarîye yê herême de ANFyî rê qisey kerd.

Elîfe Mihemed nê vatî: "Şehba xeylêk wext raştê hêrişê hukmatê Şamî, DAÎŞ û dewleta tirke ameye. Badê îşxalkerdişê Efrînî şaro ke ame Kantonê Efrîn-Şehba şaredarî semedê ci bîye seferbere. Tîya her çî serûbin bibi, qet yew îmkan çînêbi ke hewcedarîya şarî bîyaro ca. Şarê Efrînî mecbûr verê xo dayêne Şehba ke newe îşxalî ra amebi xelisnayene. Karê ma yo verên o bi ke ma na herra bimbareke ra rêçê îşxalkeran kerdî pak. Xora îmkanê ma çînêbî hetê bînî ra zî hêrişê dewleta tirke û ambargoyê hukmatê Şamî karê ma dahîna kerdêne zehmet.

Prosesê wînayênî de berpirsîyarîya şaredarî zaf bî. Qet malzemeyêkê ma çînêbi ke ma bajarî bîyarê pêser. Şar wayîrê şaredarî vejîya, xebatan dest pêkerd û pede pede xebatî bîyî gird. Ma nê şeş serran de sey şar û şaredarî zehmetîye pîlî ciwîyayî. Bitaybetî qerarê kampan de awebirnayîşî yê UNICEFî zaf zor da ma. Ambargoyê Şamî, hêrişê dewleta tirke û qerarê UNICEFî têna şarêk vêşan têşan nêverdayêne no caardişê polîtîkaya qirkerdişî bi. 

Ma sey şaredarî hewcedarîyê panc kampanê kantonî ardî ca. Şeş serrî yo UNICEFî awe dayêne kampan la nişka qerarê birnayîşê awe girewt û no zî bi sebebê xeylêk probleman. Şaredarîya ma pîya bi şarê kampe pîya xebetan rayra bena. Kanton de 30 qoyîyê awe est ê ke nê goreyê hewcedarîya şarî zaf kêm ê. Aşmanê hamnanî de 20 qoyîyî manenê. Coka tay qoyîyî ameyî xorîkerdene. Sey tedbîrî depoyê awe zêdîyayî. Xebatê dormeyî û falîyetê înşakerdişê parkan dewam kenê. Jenetorê cagirî ameyî peydakerdene. Banê mexdûranê erdlerzî hetê şaredarî ra ameyî tehmîrkerdene. Sîstemê enerjîya tîje tay cayan de ameyî aktîfkerdene. 

Ma do 2024 de projeyê eştişê eşteyî bîyarê ca. Projeyê qîrkerdişê rayîran rê dewam bikerê. Ma do pîya bi Heyva Sore projeyê eşteyê tibî yê hemparî bifînê dewre û komelêkê ekolojîkî biafirnê. Ma do bi sîstemê enerjîya tîje kuçeyanê qeza roşn bikerê. Qezayanê Ehdes û Fafînî û Kampa Berxwedanî de do newera qoyîyê awe bêrê kendene. Dewe û qezayan de do leyî bêrê ronayene û xebatê qîrkerdişê rayîyan ke 2023 de nîmcet mendî do dewam bikerê."

2023 de Kantonê Efrîn-Şehba de awe resayî şarî, malzemeyê înşaatî şawîya kampan, heme dewe û qezayan ê Şehba. Banê mexdûranê erdlerzî ameyî temîrkerdene û Kampa Berxwedan û Serdemî de semedê nê mexdûran 243 xeymî ameyî ronayene. Seba ke kampî hîra bîyî xebatê kanalîzasyonî ameyî rayraberdene. Bi wesîleya 4ê Nîsane parkêke ameye akerdene, xebatê rayîrî ameyî kerdene. Dewan de qoyîyê awe ameyî akerdene. Qezayanê Til Rifet, Ehres û Ehdas  û dewa Aqîbê de qoyîyê awe açarîyayî sîstemê enerjîya tîje. 2 mîlyon û 666 hezar û 620 lîtreyê mazotî ame vilakerdene. Kantono ke tede 75 jeneratorî est ê de  hewcedarîya elektrîkî ya 20 hezar 605 keyeyan ameye caardene.