Herêma Şehba yê ke 75 dewê ci est ê, destpêkê şerê zereyî yê Sûrîye ra nata bi herêma şer, îşxal û talanî. Her roje bombayî varanê herême ser û cuya roniştoxan binê gefan de ya.

Dima ke 2018 de Efrîn hetê dewleta tirke ra amebi îşxalkerdene roniştoxanê Efrînî koçê Şehba kerdbi.Şehba hêrişanê dewleta tirke ra ber binê ambargoyê hukmatê Şamî de ya zî. Seba ke sotemenîya herême birîyaye karê xizmet û weşîye vindertî.

Goreyê plansazîya Îdareyê Xoserî yê Rojawanî qaşo emser 200 tankerê sotemenîye biresayêne Şehba. La destûr dîya ke teyna 15 tankerî biresê.

Koçberanê Efrînî reyde nufusê Şehba qasê 200 hezar o. Seba ke sotemenîye birîyaye ceyran zî çin o coka dibistanî neçare mendî ke mabên bidê perwerdeyî. Nika 15 hezar wendekarî nêeşkenê şorê dibistanan.

Reyna destûr dîyeno ke teyna 10 hezar tupî derbazê herême bibê la vaya her tupî zî 120 hezar lîraya Sûrîye yo. Hukmatê Şamî nêverdeno ke şitê domanan û dermanî zî derbazê herême bibê. Nêweşxaneyê Avrînî de ke rojêke de 600 hezar kesî tede derman benê, verî 5 ambulansan xizmet dayêne la nika xizmetê nêweşxaneyî verê vindertişî de yê.

Qezayê Til Rifet, Ehres, Ehdas û Fafînî, kampê Efrîn, Şehba, Veger, Serdem û Berxwedanî zî ambargoyî ra mîyanê zor û zehmetîyan de yê.

Hemsereka Meclîsê Kantonê Efrînî Zelûxe Bekîr ANFyî rê qisey kerd û ard ziwan ke çar serrî yo ke hêriş û bombardumanê vera Şehba dewam kenê. Zelûxe vat: ''Vera sivîlan hêriş yeno kerdene, qirkerdiş yeno kerdene, Doman, cinî, kokimî binê hêrişan de yê. La vera nînan xoverdayîş zî dewam keno.Ambargoyê Hukmatê Şamî zimistanî dest pêkerd. Şert û mercê cuye ambargoyî ra hîna bîyî zehmet. Hetêkî ra hêrişê dewleta tirke hetêkê bînî ra zî ambargoyê Şamî. La ê nêeşkenê pê nê kerdişan îradeyê şarî bişiknê. Rûsya qaşo herême de ya la seba ke herême bikewa destê rejîmê Şamî nê kerdişan tesdîq kena.''

Zelûxe pare kerd ke par ambargoyî ra zaf kesan dinyaya xo bedilnaya û vat: ''Rewşa kampanê ma zî verê çiman de ya. Na herême de cuya rehet nîya. Rixmo ke mabênê Heleb û Şehba de sînorê kilmî est ê hukmatê Şamî 7 bendê kontrolî nayî ro. Nê 7 bendanê kontrolî de zî destûrê derbazkerdişê sotemenî, tup, ardan û dermanan nêdîyeno. Coka ma krîzêkê cidîyî de têrî yê. Eke ambargo wina dewam bikero kokim, nêweş û domanî binê tehlukeyêkê bînî de bimanê.

Seba ke ambargo bêro wedaritene ganî hukmatê Şamî rê teda bêra kerdene. Şar vera ambargoyê Şamî û hêrişanê dewleta tirke xoverdayîşêkê pîlî keno. Se beno wa bibo ma têkoşîn de qerardar ê. Şarê ma zaneno ke armancê Şam û Tirkîya çita yo. Şarê ma wazeno abigêro Efrînî. Bedelê ci çi beno wa bibo ma do seba ney têkoşîn bikerê.''