Endamê Konseya Hemserekîye ya PYDyî Aldar Xelîlî cewab da persanê ANFyî rê.

Aldar Xelîlî da zanayene ke pê Komployê Mîyanneteweyî Rojhelatê Mîyanênî de hêzanê mîyanneteweyîyan prosesêko newe dayo destpêkerdene û destpêkê 2000an de zî prosesêko newe yo bîn dest pêkerd.

Xelîlî vat: ''Dewleta tirke nê prosesî de bi hawayêkê aktîfî ca girewt. Armancê ci  2 çîyî bîyî; Rayber Apo û Têgêrayîşê Azadîye bêtesîr bikera û nê prosesê neweyî goreyê menfaatanê xo bixebitna. Çarçewa nê armancan de Tirkîya Rojawan, Sûrîye îşxal kerdî; Tunus, Misir, Sûdan, Yemen, Azerbaycan, Armenîstanî rê mudaxele kerd. Nika zî xîret kena ke Başûr û Şingal îşxal bikera.

Îşxalê dewleta tirke nêbo ke Rojawan de hînî dewam bikero. Tirkîya îşxalî reyde awanîya demografî ya herêmanê ma vurnena. Pêro hêzê sîyasî û îdareyî yê Rojawanî vera nê îşxalî yê. Xora nika vera îşxalî xeylêk çalakîyî yenê kerdene. Îşxalkerî verî Efrînî ra dima zî Serêkanîyê û Girê Sipî ra do bêrê vetene. Dewleta tirke kamca îşxal kerdo uca ra do bêra vetene. Xebatê sîyasî, rêxistinî, leşkerî pêro bi nê armancî yenê kerdene.''

Aldar Xelîlî bale ante ser ke rejîmê Şamî semedo ke nêeşkeno welatî îdare bikero vera hêzanê mîyanneteweyîyan qels maneno. Xelîlî vat: ''Rejîm bi taybetî nêeşkeno vera Tirkîya tewirêk bigêro. Key rejîm tewir bigêro serê Îdlîbî ra teda vîneno. Dewleta tirke zî goş nêkewena rejîmî. Rejîmê Şamî û Tirkîya vera şorişgêranê kurdan 'Mutabaqatê Adana' îmza kerdbi. Dewleta tirke her ca de vana 'Rejîmê Sûrîye meşrû nîyo' la wexto ke babete bena Mutabaqatê Adana cade rejîmî şinasnena.

Ez venga rayaumûmîya Tirkîya, pawitoxanê heqanê merdiman, terefgîranê azadî û demokrasî yê Tirkîya dana ke wa bizanê ke îşxalê Tirkîya yê vera Rojawanî înan rê qetî fayde nêkeno heta krîzê înan keno pîlêr. Serrê verê ma de netîceyê xirabî yê nê îşxalî do zêdêr tesîrê şaranê Tirkîya bikero. Sey şaranê Sûrîye ma anê ziwan ke hewceyê ma bi sîstemêkê neweyî yê demokratîkî esto. Wa Sûrîye de heqê pêro şaran estbê û pêro şarî azad bê. Sûrîyeya winasêne do bihêzêr biba, nêbo meseleyê rejîmî do yewîya şaranê Sûrîye parçe bikerê. Ma ganî heqanê yewbînan qebul bikerê, pîya Sûrîyeya demokratîke awan bikerê û wayîrê ci vejîyê.''