Endamê Konseya Hemserekîye ya PYDyî Aldar Xelîlî derheqê xebatanê Şorişê Rojawanî de ANFyî rê qisey kerd.

Aldar Xelîlî îfade kerd ke Şorişê Rojawanî şorişêko komelkî yo û vat: ''Armancê şorişî no yo ke komel goreyê raştî û xozaya xo biciwîyo. Mîyanê ney de ganî azadî, edalet û têdûştîye bêrê mojnayene. Tay kesî bi hawayêkê şaşî komananê ma ercnenê. La komunî bingeyê rêxistinîya şarî yê. 11 serrî yo mîyanê komelê ma de komunî est ê. Kooperatîfî zî dewamê komunan ê. Bi rayîrê kooperatîfan ma eşkenê ekonomîya xo awan bikerê. Seba caardişê azadîye û serkewtişê şorişî bi xo awankerdişê ekonomî esas o. Ganî ma xo rêxistin bikerê ke ekonomîya xo awan bikerê û hewcedarîyanê şarî xo peyda bikerê.''

Xelîlî qala girîngîya sîstemê pawitişê komelî kerde û vat: ''Ma qala pawitişê cewherî kenê. Sîstemê îqtîdarî komel parçe kerdo û bêpawitiş verdayo. Eke ma pawitişê xo xurt bikerdêne, rêxistinîya xo hol bikerdêne dişmen nêeşkayêne Efrîn îşxal bikero. Ma Efrîn de têna sîstemê pawitişî yo leşkerî xo rê esas kerd. La ganî şar zî mîyanê sîstemê xopawitişî de ca bigêro. O çax sîstemê xopawitişî beno raştikên û yeno caardene.''

Xelîlî da zanayene ke Peymana Komelkîye yena amadekerdene û vat: ''Ma nika prosesê peyênî yê peymane de yê. Ma do rojanê verê ma de şarê xo rê şablonê peymane eşkera bikerê û fikranê şarî bigêrê. Peymane de bi taybetî girîngîye dîyaye têkoşînê azadîye cinîyan. Çunke bê azadîya cinîyan mumkîn nîyo ke şoriş bêro caardene.''